काठमाण्डौ। बिहेको प्रलोभन देखाई विश्वासमा पारी रकम ठगी गरेको आरोपमा प्रहरीले एक पुरुषलाई पक्राउ गरेको छ।
रामेछाप जिल्ला साँघुटार नगरपालिका वडा नं -३ घर भइ हाल काठमाण्डौ धापासी बस्दै आएका ५२ वर्षीय नबिन भन्ने लोक बहादुर श्रेष्ठलाई प्रहरीले ठगी गरेको आरोपमा आइतबार पक्राउ गरेको हो।
महानगरीय अपराध महाशाखाका अनुसार श्रेष्ठले ठगी गर्ने योजना बनाई फोन मार्फत बिहेको आश्वासन देखाएर आफू कहिले बिरामी परेको बहाना देखाउँदै, कहिले अस्पतालमा उपचार गर्न त कहिले झारफुक गर्नका लागि भन्दै पीडितसँग आईएमई तथा सिटी एक्सप्रेस मार्फत पटक-पटक गरी ४२ लाख ३४ हजार रुपैयाँ पठाउन लगाई ठगी गरेका थिए।
श्रेष्ठले उक्त रकम ठगी गरेको भन्ने जाहरी पश्चात महाशाखाबाट खटिएको बिशेष प्रहरी टोलीले आइतबार काठमाण्डौको विशाल नगरबाट पक्राउ गरेको हो।
पक्राउ परेका उनीमाथि ठगी सम्बन्धी कसुरमा थप अनुसन्धानका लागि महानगरीय प्रहरी परिसर पठाईएको प्रहरीले जनाएको छ ।