पोखरा । जनता समाजवादी पार्टी (जसपा) ले आसन्न स्थानीय तहको चुनावमा सत्ता गठबन्धन तोड्ने चेतावानी दिएको छ । नेपाली कांग्रेसले पेलेरै अगाडि बढ्न खोजेकाे भन्दै कास्कीमा गठबन्धनबीच मनमुटाव सिर्जना भएको छ । यहाँ काँग्रेसकाे पेलानमा जसपा फेरि पर्न लागेकाे हाे । गण्डकीमा काँग्रेस नेतृत्वकाे नयाँ सरकार गठन हुँदा पनि लिखित सहमति नै लत्याएकाे काँग्रेसले स्थानिय तह चुनावमा पनि जसपलाई चिसै पानीमा नुहाइदिने सम्भावना बलियाे बनेकाे छ ।

स्थानीय तहको चुनावमा जसपाले कास्कीमा कम्तिमा १ वटा पालिका प्रमुख र एउटामा उपप्रमुखकाे माग गरेकाे थियाे । याे प्रस्तावमा काँग्रेस असहमत भएपछि गठबन्धनबाट बाहिरीने चतावानी दिएको हो । यद्यपी अहिले पनि काँग्रेससहित गठबन्धनकाे बैठक बसिरहेकाे छ ।

कास्कीका चार गाउँपालिकाको वडा तहसम्मको भागवण्डा टुंग्याउन आइतबार साँझ गठबन्धनको बैठक बसेको थियो । त्यसमा कांग्रेसले एउटा पनि पालिकाको उपप्रमुखसमेत नदिने प्रस्ताव ल्याएपछि जसपाले एक्लै लड्ने मानसिकता बनाएको छ ।

‘हाम्रो माग सकेसम्म धेरै पालिकाको उपप्रमुख दिनुपर्छ भन्ने थियो । तर, बैठकमा हामीलाई समन्वय समितिको पदाधिकारी र वडाध्यक्ष दिने भनियो । त्यसपछि आफ्ना कुरा राखेर बैठकबाट निस्कियौँ,´ जसपाका एक नेताले भने ।

कास्कीमा पोखरा महानगरपालिका, अन्नपूर्ण, माछापुच्छ्रे, मादी र रूपा गरेर चार गाउँपालिका छन् । महानगरको मेयर-उपमेयर कुन पार्टीले पाउने टुंगो केन्द्रकै गठबन्धनले लगाउने भएकाले महानगरबारे कास्कीको गठबन्धनमा छलफल नै भएको छैन । गठबन्धनको बैठक सोमबार पुनः बस्दै छ । त्यसमा सहभागी हुने र सम्मानजनक व्यवहार नगरे एक्लै चुनाव लड्ने मनसाय जसपाका नेताहरूले बनाएका छन् ।

‘हामीले प्याकेजमा कसले के पाउने ल्याउनुस्, हुन्छ-हुँदैनमा जवाफ दिन्छौँ भनेका छौँ । हाम्रो चित्त नबुझे एक्लै चुनाव लड्छौँ,´ ती नेताले भने । २०७४ सालको निर्वाचनमा हालको जसपा (तत्कालीन संघीय समाजवादी)का उम्मेदवार हुम गुरुङले पाेखरामा ३ हजार १ सय ७० मत ल्याएका थिए ।

२०७६ सालको कास्की-२ को उपनिर्वाचनमा समाजवादी पार्टीका धर्मराज गुरुङले १ हजार ९ सय २२ मत ल्याएका थिए । चुनाव लडेका नेता हुम गत फागुनमा एमाले प्रवेश गरेका थिए । त्यही कारण कमजोर मानेर आफूहरूलाई कांग्रेसले पेलेर जान खोजेको आकलन जसपाका नेताको छ ।

तर, पोखरा महानगरमा जसपाको मत ३ हजार जति रहेको र गठबन्धनको हार-जितमा निर्णायक हुने जसपाका नेताको दाबी छ । `हामीले एक्लै लड्दा चुनाव जित्दैनौँ त्यो थाहा छ । तर, हामी निर्णायक बन्न सक्छौँ,´ जसपाका नेताले भने, `गठबन्धनमा कुरा नमिले अरु दलसँग तालमेल गरेर जान सक्छौँ । एमालेसँग जाने राजनीतिक सम्भावना छँदैछ ।´ गठबन्धनमा खटपट देखिएको जानकारी जसपाका संघीय परिषद् अध्यक्ष डा. बाबुराम भट्टराईसम्म पनि पुगेको छ ।

गठबन्धनबाट बाहिरीएर एमालेसँग तालमेल गरेर चुनावमा जान सक्ने जसपका अर्का नेता बताउँछन् । ‘गठबन्धनले स्थानीय चुनावमा जसपालाई सम्मान जनक व्यवहार गरेन । स्थानीय पालिकाहरुमा हामीलाई शून्य बनाउने प्रयास गरियो,’ उनले भने, ‘अब सम्मान जनक व्यवहार नभए एमालेसँग पनि तालमेल हुन्छ ।’