पोखरा महानगरपालिकाको मेयरमा नेकपा एमालेबाट कृष्णबहादुर थापा उम्मेदवार छन् । नेता दीपक पौडेललाई मेयरको टिकट दिने भनेर पार्टीले गरेको निर्णय उल्टिएपछि सोमबार बिहानै उनले खुसीको खबर सुन्न पाए । मेयरको उम्मेदवारी दर्ता गर्नुअघि गण्डकी प्रदेशसभा सदस्यसमेत रहेका थापाले राजीनामा दिएका छन् । राजीनामा बुझाउन सोमबार दिउँसो प्रदेशसभा सचिवालय नदीपुर पुगेका थापासँग गरिएकाे संक्षिप्त कुराकानीः

२०५४ सालमा मेयर हुँदा र अहिलेको परिस्थिति फरक छ । चुनाव जितेमा कुन विषयलाई प्राथमिकता दिनुहुन्छ ?

पार्टी अध्यक्ष र पार्टीले मलाई विश्वास गरेर पोखरा महानगरपालिकाको मेयरको टिकट दिएको छ । चुनाव जितेमा हामी जनताको दैनिक कामलाई चुस्त, पारदर्शी र सर्वसुलभ बनाउनेमा केन्द्रित हुनेछौँ ।

पोखरामा अल्पकालीन र दीर्घकालीन गुरुयोजना बनाउँछौँ । त्यही गुरुयोजनाअनुसार भविष्यमा पोखरालाई प्राकृतिक सौन्दर्य र सांस्कृतिक सम्पदा भएको, सभ्य-सुसंस्कृत नागरिकले बसोबास गरेको आर्थिक रूपले सम्पन्न महानगर बनाउने र भविष्यमा स्मार्ट सिटीको रुपमा अघि बढाउने सोच छ ।

२०५४ सालमा पोखरा सानो थियो । त्यतिबेला जम्मा ५५ वर्ग किलोमिटर थियो । अहिले साढे चार सय किलोमिटरमा पोखरा फैलिएको छ । वडा थपिएका छन्, गाविस महानगरमा गाभिएको अवस्था छ । हरेक वडा, हरेक घरदैलोमा सेवा पुर्‍याउनु हाम्रो प्राथमिकता हुन्छ ।

पार्टी टुटफुटको अवस्था छ । एमाले नै एकताबद्ध हुन आवश्यक छ । टुटफुटले असर गर्ने हो कि ?

लोकतान्त्रिक, प्रजातान्त्रिक मूल्य मान्यतालाई आत्मसाथ गरेर स्वस्थ प्रतिस्पर्धा गर्छौं । अहिले त्यो सकियो र अब एकजुट भएर अघि बढ्छौँ र जित्छाैँ। एमालेको एकजुट भएर अगाडि बढ्ने जुन संस्कृति छ त्यसलाई अबलम्बन गरेर हाम्रो नेता-कार्यकर्ता र जनताको साथले नै अघि बढ्छौँ ।

मेयरमा तपाईंभन्दा अगाडि अर्कै नेताको नाम थियो । उहाँसँग मिलेर कसरी अगाडि बढ्नुहुन्छ ?

उहाँ (दीपक पौडेल) मेरो दाजु हुनुहुन्छ । पार्टीले जे निर्णय गरेको छ त्यसलाई आत्मसाथ गरेर सँगसँगै पार्टीको हितका लागि अगाडि बढ्छौँ ।

प्रदेशसभा सदस्यबाट राजीनामा दिनुभयो । मतदाताको बेवास्ता भएन र ?

प्रदेशसभा सदस्यमा मलाई भारी मतले जिताउनु हुने मेरो निर्वाचन क्षेत्रका जनतालाई धन्यवाद भन्छु । त्यसको साथै म अहिले पनि जनताको सेवामा तल्लीन भएकाले आठ महिना कार्यकाल बाँकी रहँदारहँदै पार्टीले मौका दिएको छ । म निरन्तर जनताको काममा गोरुजस्तै नम्र बनेर जनताको सेवामा समर्पित रहने छु ।