पोखरा । नेकपा एमाले स्थायी कमिटी सदस्य एवं संगठन विभाग प्रमुख खगराज अधिकारीले गठबन्धनले छरेका भ्रममा विश्वास नगरी एमालेलाई मतदान गर्न आग्रह गरेका छन् ।

मंगलबार मादी ४ तारकाङमा आयोजित एमालेको चुनावी सभामा बोल्दै नेता अधिकारीले आफूहरुले गरेको काम र ल्याएका योजनामा विपक्षी पार्टीकाले दाबी गरेकाले त्यसमा विश्वास नगर्न मादीवासीलाई आग्रह गरेका हुन् ।

‘एमाले कांग्रेसजस्तो होइन । एमाले जति भन्छ त्यति गर्छ । भनेकोभन्दा बढी गर्न सक्छ । गाउँगाउँमा बाटो बनाएका छौँ । रातो किताबमा बजेट हाल्ने हामी हौँ । तर, मैले बनाएँ भन्ने भाइबहिनीका नक्कली कुरा नसुन्नुहोला,’ अधिकारीले मतदातालाई आग्रह गरे । मादीका १२ वटै वडा एमालेले जित्ने अधिकारीले दाबी गरे ।

सूर्यमा भोट हालेर मत सुरक्षित गर्न अधिकारीले मतदातालाई आग्रह गरे । ‘गठबन्धन एउटा पार्टी, एमाले एउटा पार्टी हो । शिरदेखि तिरसम्म सूर्यमा भोट हाल्न पाइन्छ, कतै खोज्नै पर्दैन । खोज्दै कता हालौँ भन्नै पर्दैन । सूर्यमा छाप लगाएपछि मतको सुरक्षा पनि हुन्छ,’ अधिकारीले भने ।

कार्यक्रममा मादी ४ को पाँच वर्षका काम समावेश गरिएको पुस्तक नेता अधिकारीले सार्वजनिक गरेका थिए ।