नुवाकोटको ककनी गाउँपालिकास्थित विद्युत्‌को प्रसारण लाइनमा झुण्डिएका पुरूषलाई ८ घण्टापछि उद्धार गरिएकाे छ ।

नेपाली सेनाको तालिमप्राप्त सैनिकहरु टावरमा चढेपछि शनिबार बिहान साढे १० बजेदेखि तारमा बस्दै आएका व्यक्ति साँझ ७ बजे ओर्लिएका हुन् ।

उच्च भोल्टेज क्षमताको प्रसारण लाइनमा बेलकोटगढी नगरपालिका १३ का माईला भनिने प्रेम बिक शनिबार बिहान ११ बजेतिर चढेका थिए । उनी पोलमा चढ्न थालेपछि करेन्ट लाग्न सक्ने भन्दै स्थानीयको खबरपछि प्राधिकरणले उक्त प्रसारण लाइनको बिजुली काटेको थियो ।

बिक तारमा झुण्डिएर हिँडिरहेको अवस्थामा स्थानीयहरूले भिडियो समेत बनाएर सार्वजनिक गरेका थिए । स्थानीयहरूले तयार पारेर सामाजिक सञ्जालमा सार्वजनिक गरेको भिडियोमा बिकले मानसिक सन्तुलन गुमाएको पनि बताइएको छ । बिक तारमा झुण्डिएको तस्बिर र भिडियो शनिबार दिनभर सामाजिक सञ्जालमा व्यापक रुपमा सेयर गरिएको छ ।

कराेड घाटा

माथिल्लो त्रिशूली थ्री ए अवरुद्ध हुँदा नेपाल विद्युत् प्राधिकरणलाई एक करोड घाटा भएको छ ।

नेपाल विद्युत् प्राधिकरणका प्रवक्ता सुरेश बहादुर भट्टराईका अनुसार करिब ९ घण्टा विद्युत् अवरुद्ध हुँदा एक करोड बढी घाटा भएको छ ।

यसैबीच, ऊर्जामन्त्री पम्फा भुसालले उनको उद्धार गर्न नेपाली सेनालाई आग्रह गरेकी थिइन् । त्यसपछि सेनाकाे टाेली हेलिकप्टर लिएर ककनी पुगेकाे हाे ।