पोखरा महानगरपालिकाले सर्वसाधारणलाई सार्वजनिक रुपमा शौचालय उपयोग गर्न दिनका लागि इच्छुक व्यक्ति तथा सँस्थालाई आह्वान गरेको छ।

महानगरले एक विज्ञप्ति जारी गर्दै पोखराको मूख्य शहरी क्षेत्रमा सार्वजनिक शौचालय नहुँदा र निर्माणका लागि जग्गा जमिन समेत नभएको अवस्थामा सर्वसाधारणलाई समस्या भएकाले शौचालय उपयोग गर्न दिन चाहने व्यक्ति, बैंक तथा वित्तिय सँस्था लगायत होटल रेष्टुरेन्ट सहितका व्यवसायिक सँस्थाहरुलाई महानगरमा सम्पर्क गर्न आह्वान गरेको हो।

महानगरले त्यस्ता सार्वजनिक शौचालयमा आवश्यक पर्ने सफाई एवं स्यानिटरी सामग्रीमा लागत सहभागिता जनाउने र ती स्थानमा जानकारीको लागि विशेष पहिचानयुक्त संकेत (लोगो) राखने निर्णय भएको समेत जनाएको छ।

विज्ञप्तिमा शौचालय सार्वजनिक रुपमा प्रयोग गर्न दिन चाहने व्यक्ति तथा सँस्थाको विवरण महानगरपालिकाको वेभसाइटमा राखिने र महानगरबाट उपलव्ध हुने सेवा सुविधामा प्राथमिकता दिइने उल्लेख गरिएको छ।

इच्छुक त्यस्ता व्यक्ति तथा सँस्थाले साउन मसान्तरसम्म महानगरको सरसफाई शाखामा सम्पर्क गर्न सक्नेछन्।