काठमाडौं । नेपालको पासपोर्ट (राहदानी) विश्वकै सबैभन्दा कमजोर रहेको एक अध्ययनले देखाएको छ। लन्डनमा रहेको हेन्ली कम्पनीले गरेको ‘पासपोर्ट इन्डेक्स’ नामक अध्ययनमा नेपालको राहदानी निकै कमजोर पाइएको हो।

अध्ययनले नेपाली राहदानीलाई उत्तर कोरियाभन्दा पनि तल अर्थात् १०६ औं स्थानमा राखेको छ। उत्तर कोरिया नेपालभन्दा एक स्थान अगाडि (१०५ औं) स्थानमा छ। गत वर्ष नेपाल १०९औं स्थानमा रहेको थियो।

विश्वका कति देशहरूले भिसाबिनै (भिसाफ्री स्कोर) ती देशमा प्रवेश गर्न दिन्छन् भन्ने आधारमा उक्त सूची तयार गरिन्छ। जसअनुसार जापान एक नम्बरमा छ। त्यस्तै सिंगापुर र दक्षिण कोरिया दोस्रो तथा जर्मनी र स्पेन तेस्रो स्थानमा रहेका छन्।

जापानी नागरिकहरूले पहिले नै भिसा नलगाई संसारका १ सय ९३ देशको भ्रमण गर्न पाउँछन् भने नेपालीले मात्र ३८ मुलुकको भ्रमण गर्न मिल्छ। दोस्रो शक्तिशाली सिंगापुर र दक्षिण कोरियाको राहदानीले १ सय ९२ देश र तेस्रो स्थानमा रहेको जर्मनीको राहदानीले १ सय ९० देश घुम्न सकिन्छ।