पोखरेली स्वतन्त्र युवाहरूले नागरिकता संशोधन विधेयक विरुद्ध बुधवार विरोध सभाको आयोजना गरेका छन्।

युवाहरूले प्रतिनिधिसभाबाट नागरिकता विधेयक पारित भएपछि त्यसको विरोध स्वरूप पोखराको मानवअधिकार चोकमा विरोध सभाको आयोजना गरेका हुन्।

विरोध सभामा उपस्थित अटेरी अभियानका गनेस पौडेलले नेपाल सरकारले हालै जारी गरेको नागरिकता ऐनले नागरिकतालाई अत्यन्तै सस्तो विषयवस्तुको रूपमा लिएको बताए। उनले नागरिकता जस्तो संवेदनशील विषयमा असंवेदनशीलता जनाउने र महिला विभेदलाई प्रोत्साहन गर्ने खालका विभेदको खारेजको माग गर्दै विरोध सभाको आयोजना गरिएको बताए।

यस्तै, विरोध सभामा सहभागी सुवास शर्माले नागरिकताको विषयमा सरकार उदासीन बनेको आरोप लगाए। उनले संसदीय समितिले दिएको न्यूनतम मापदण्ड समेत पालना नगरी छोटो अवधिमा अल्पसंख्यामा उपस्थित सांसदको सहमतिमा जबरजस्ती विधेयक पारित गरिएको बताए। उनले नागरिकता विधेयक शङ्कास्पद हुनुका साथै महिलामाथि विभेदपूर्ण वाक्यहरू राखिएको आरोप लगाए।

सहभागीहरूले सरकारले नागरिकताको अवमूल्यन गरेको भन्दै रू एक सयको ३ वटा नागरिकता विक्रीमा, ‘ए हजुर कता ? रू १०० को ३ वटा नागरिकता यता’ भन्दै साङ्केतिक विरोध गरेका थिए भने, अन्यले संसदीय समितिको सुझाव पालना गर, महिला माथिको विभेद अन्त्य गर, नागरिकता बेच्ने होसियार, नागरिकताको गरिमा कायम गर लेखिएका प्ले कार्ड बोकेका थिए।