काठमाडौं । दुबई पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

पक्राउ पर्नेमा तनहुँ जिल्ला भिमाद नगरपालिका -२ घर भई हाल काठमाडौ -२६ सामाखुसी बस्ने २६ वर्षीय मन बहादुर कुमाल छन्।

काठमाण्डौ महानगरपालिका-२६ स्थित यूरो टेक कन्सलटेन्सी प्रालिका मार्केटिङ म्यानेजर समेत रहेका कुमालले एक व्यक्तिलाई वैदेशिक रोजगारका लागि दुबई पठाइ प्रतिष्ठित कम्पनीमा ६० हजार रूपैयाँ भन्दा बढी तलब हुने काम लगाइदिन्छु भन्दै प्रलोभनमा पारी पीडितबाट पटकपटक गरी ३ लाख ५० हजार रुपैयाँ लिई ठगी गरेको प्रहरीले जनाएको छ।

प्रहरीका अनुसार वैदेशिक रोजगार विभागबाट पत्राचार भएपछि काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीको टोलीले उनलाई काठमाडौं -२६ नयाँ बसपार्कबाट शुक्रबार दिउँसो पक्राउ गरेको हो ।

उनलाई थप अनुसन्धान तथा कारवाहीका लागि वैदेशिक रोजगार विभाग बुद्धनगर काठमाडौं पठाइएको प्रहरीको भनाई छ ।