उदयपुर। सामाजिक सञ्जालको दुरूपयोग गरी रकम ठगी गरेको अभियोगमा प्रहरीले सात जनालाई पक्राउ गरेको छ।

झापा जिल्ला बिर्तामोड नगरपालिका -५ ईन्द्रटोल बस्ने भारत उत्तराखण्ड पौडी गढवाल भृगुखाल घर भएका २५ वर्षीय प्रविण भट्ट सहित ७ जनालाई प्रहरीले पक्राउ गरेको हो ।

प्रहरीका अनुसार उनीहरूले उदयपुर कटारी नगरपालिका -४ बस्ने ३६ वर्षीया महिलालाई सामाजिक सञ्जाल फेसबुक म्यासेन्जर तथा ह्वाट्सएप मार्फत ठगी गरेका हुन्।

उनीहरुले सामाजिक संजालबाट मार्फत “तपाईलाई सामान र अमेरीकी डलर ७० हजार पठाइदिएको छु, त्यसको ट्याक्स वापत १ लाख ३० हजार ६ सय २७ रुपैयाँ पठाउनु” भनि रकम हाल्न लगाएर ठगी गरेका थिए। उनीहरुले ठगी गरेको खुल्न आएपछि विभिन्न मिति र स्थानबाट प्रहरीले पक्राउ गरेको हो ।

पक्राउ पश्चात प्रहरीले गरेको अनुसन्धानमा उनीहरुले खोलेको संस्थाको खातामा एक वर्षमा १ अर्ब ९ करोड १ लाख ४२ हजार ३ सय ९३ रुपैयाँको कारोबार भएको खुल्न आएको छ ।

उनीहरुउपर मुलुकी अपराध संहिता, २०७४ अन्तर्गत ठगी, आपराधिक विश्वासघात तथा आपराधिक लाभ र संगठीत अपराध सम्बन्धी कसूरमा जिल्ला अदालत उदयपुरबाट म्याद थप गरी आवश्यक अनुसन्धान भइरहेको प्रहरीको भनाई छ ।