काठमाडौं । नेपालले रेमिट्यान्स आप्रवाहमा मासिक रेकर्ड कायम गरेको छ । साउन महिनामा हालसम्मकै धेरै अर्थात्‌ १ खर्ब १६ अर्ब २ करोड रुपैयाँ रेमिट्यान्स भित्रिएको हो ।

देशको आन्तरिक अर्थतन्त्र शिथिल भइरहेका बेला रेमिट्यान्स आप्रवाहमा भने उल्लेख्य सुधार देखिएको हो ।

नेपाल राष्ट्र बैंकका अनुसार आर्थिक वर्ष २०८०/८१ को पहिलो महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति १२.५ महिनाको वस्तु आयात र १०.३ महिनाको वस्तु तथा सेवा आयात धान्न सक्ने अवस्था रहेको छ ।

अमेरिकी डलरसँग नेपाली रुपैयाँको विनिमयदर बढेको र रोजगारी खोज्दै विदेश जाने नेपालीको संख्या दिनानुदिन बढिरहेका कारण रेमिट्यान्स आप्रवाह ह्वात्तै बढेको हो ।

विप्रेषण आप्रवाह नेपाली रुपैयाँमा २५.८ प्रतिशतले र अमेरिकी डलरमा २१.५ प्रतिशतले बढेको केन्द्रीय बैंकले जानकारी दिएको छ ।