पर्वतको कुश्मा नगरपालिका वडा नं. ७ खरेहा र वडा नं. ८ चुवाको सीमामा रहेको तमादीखोलामा शनिबार बेलुकी आएको बाढीले बगाएर बेपत्ता दुई जनामध्ये एक जनाको शव भेटिएको छ ।

कास्कीको अन्नपूर्ण गाउँपालिका वडा नं. ३ नौडाँडाका २७ वर्षिय विजय भन्ने माधव पौडेलको शव भेटिएको हो । गल्याङ नगरपालिको मिर्मिस्थित कालीगण्डकी ए जलविद्युत आयोजनाको बाँधमा आज बिहान शव भेटिएको हो । भेटिएको शवको तस्विर परिवारले आफ्नो छोराको रहेको बताएको प्रहरीले जनाएको छ । यद्यपी, यसको पुष्टि हुन बाँकी छ ।

जिल्ला प्रहरी कार्यालय पर्वतका डीएसपी खुमलाल भुसालले शव सनाखतका लागि अहिले परिवार त्यसतर्फ जाँदै गरेको बताए ।

गण्डकन्यूजसँग उनले भने – ‘आज विहान बाँधमा शव भेटिएको भन्ने स्याङ्जाबाट खबर आयो । त्यहाँबाट पठाएको तस्वीर हेर्दा लामो कपाल र गोडाले गर्दा छोराको भएको माधवका बुवाआमाले बताउनुभएको छ । उहाँहरु जाँदै हुनुहुन्छ । सनाखतपछि पुष्टि हुन्छ ।’

घटनामा उनीसँगै बेपत्ता बागलुङको ताराखोला गाउँपालिका वडा नं. ३ इदिका ५० वर्षिय डम्बरबहादुर थापाको अवस्था भने अझै अज्ञात रहेको छ । सुरक्षाकर्मीले खोजीकार्य जारी राखेको छ । माधवका साथी रुपन्देही जिल्ला तिलोत्तमा नगरपालिका ९ का ३४ वर्षिय गोपाल बस्यालको भने सोहि दिन शव फेला परेको थियो ।

बागलुङबाट पोखरातर्फ जाँदै गरेको ग१ज ६२१३ नम्वरको जीप शनिवार साँझ साढे ६ बजेतिर एक्कासी बाढी आउँदा ३ यात्रुसहित जीपलाई बगाएको थियो । चालक हेम्जाका बसन्त थापा भने गाडीबाट ओर्लेका कारण जोगिएका थिए ।

सम्बन्धित समाचारः

माधव र डम्बर अझै फेला परेनन्, माधवको पर्स आमाले भेटिन्

दुई जना अझै भेटिएनन्, तीन जनाकै सनाखत, पोखराबाट तालिमप्राप्त कुकुर खटाइयो

तीन मध्ये दुई जनाको पहिचान खुल्यो, कास्की नौडाँडाका बिजय पौडेल र रुपन्देही तिलोत्तमाका गोपाल बस्याल

पर्वत जीप दुर्घटनाः एक जनाको शव फेला, गाडीको पाटपूर्जा मोदीखोला दोभानमा भेटियो

पर्वतमा तमादी खोलाले जीप बगाउँदा ३ यात्रु बेपत्ता, चालक सुरक्षित