कास्कीमा बाइक मोडिफाई गरी चलाउने दुई दर्जन बढी कारबाहीमा परेका छन् । जिल्ला ट्राफिक प्रहरी कार्यालयको समन्वयमा पर्व नजिकिँदै गर्दा विशेष सुरक्षा योजना अन्तरगत मोडिफाई  गरिएका सवारी साधनमाथि निगरानी बढाएको कास्की प्रहरीले जनाएको छ ।

आइतबारमात्रै करिब २ दर्जन बढी साउण्ड बढी निकाल्ने र मोडिफाइड मोटरसाइकललाई नियन्त्रणमा लिइएको कास्की प्रहरीका प्रवक्ता डिएसपी श्रवण कुमार बिकले बताए । उनका अनुसार स्वरुप परिवर्तन गरिएको सवारी साधनलाई कारवाही गरेबापत पछिल्लो ४ आर्थिक वर्षमा कुल ५ करोड ६८ हजार ५ सय रुपैयाँ राजस्व संकलन गरिएको छ ।

चालु आर्थिक वर्षमा ४ सय ४८ वटा मोटरसाइकललाई कारबाही गर्दा ३ लाख २७ हजार, गत आर्थिक वर्ष २०७९/०८० मा १ हजार ८ सय ४५ वटा मोडिफाइ भएका सवारीलाई कारवाही गर्दा २ करोड ६२ लाख ८ हजार ५ सय रुपैयाँ, आर्थिक वर्ष ०७८/०७९ मा १ हजार १ सय ९६ वटा सवारीलाई कारवाही गर्दा १ करोड १६ लाख २ हजार र आर्थिक वर्ष ०७७/०७८ मा ९ सय ८९ वटा स्वरुप परिवर्तन गरिएको सवारीलाई कारवाही गर्दा ९५ लाख १ हजार राजश्व संकलन भएको हो ।

प्रवक्ता विकले मोडिफाइ गरेका केही मोटरसाइकलहरु नियन्त्रणमा रहेको बताउँदै पहिलेकै अवस्थामा परिवर्तन गराएर अभिभावकको रोहबरमा बुझाउने बताए । ‘स्थानीयहरुको गुनासोपछि मोडिफाइ भएका मोटरसाइकलहरु केही दिनयता नियन्त्रणमा लिएका छौं’, उनले भने, ‘मोडिफाइ भएका मोटरसाइकलहरुलाई पुनः पहिलेकै अवस्थामा परिवर्तन गर्न लगाएर कारवाहीपछि अभिभावकको रोहबरमा सवारी धनीलाई बुझाउँछौं ।’

डिएसपी बिकले स्वरुप परिवर्तन गरिएको सवारीलाई नियन्त्रणमा लिने अभियानलाई निरन्तरता दिने बताए । ‘पर्व नजिकिदै गर्दा सुरक्षा योजना पनि बनिरहेको छ । बजार क्षेत्र र भित्री गल्लीमा चर्को आवाज निकाल्ने, विभिन्न किसिमबाट लुक्स परिवर्तन गर्ने मोटरसाइकललाई नियन्त्रणमा लिन्छौँ’, उनले भने,‘पहिलो चरणमा अभिभावकलाई बोलाएर सम्झाई बुझाई कारवाही स्वरुप जरिवाना तिराउछौं । पछि पनि त्यही साधन दोहोरियो भने सवारी व्यवस्था ऐन अनुसार कडा कारवाही नै गर्छाै ।’

उनले मोटरसाइकल मोडिफाई गर्नेलाई समेत कानूनी कारवाहीको दायरामा ल्याउने बताए । ग्यारेज, वर्कशप तथा स्टीकर हाउसले स्वरूप परिवर्तन तथा ध्वनी प्रदुषण हुने गरी माेडिफाई काम गर्नु हुँदैन ।

जिल्ला ट्राफिक प्रहरी कार्यालय कास्कीका प्रवक्ता तथा प्रहरी वरिष्ठ नायब निरीक्षक शिव प्रसाद पाठकका अनुसार सबैभन्दा बढि मोडिफाई गर्ने साधनमा क्रस फायर र बुलेट रहेका छन् ।