महोत्तरीमा सामान्य विवादमै दुई जना भारतीय युवकले नेपाली साथीको हत्या गरेका छन्।

पिपरा गाउँपालिका-५ हर्दिया टोलका आशिक भनिने १९ वर्षीय वसन्त पासवानको बिहीबार बेलुकी हत्या भएको प्रहरीले जनाएको छ। वसन्तको शव उनकै गाउँमा स्थानीय जगदिश साहको खेतमा फेला परेको थियो।

भारतको बिहार राज्यको मधुवनी जिल्लास्थित जयनगर घर भएका १९ वर्षीय दिपक मलिक र मधुवनी साहारघाट बसबरिया घर भएका १८ वर्षीय अमित मलिकले छुरा प्रहार गरी वसन्तको हत्या गरेको जिल्ला प्रहरी कार्यालय महोत्तरीका प्रवक्ता डिएसपी दिपक गिरीले जानकारी दिए।

दिपक र अमित दसैं मनाउन हर्दिया टोलस्थित मामाघर आएका थिए। डिएसपी गिरीका अनुसार बिहीबार दिउँसो उनीहरू वसन्तलाई लिएर गाउँमै लागेको दसैं मेला हेर्न गएका थिए।

दिपक र अमितले मेलामा सुनजस्तो देखिने सिक्रीको माला किनेका थिए। माला लगाएर तीनै जनाले फोटो खिचे। अन्तिममा माला लगाएका वसन्तले फिर्ता गर्न नमान्दा विवाद भएछ। त्यसै क्रममा मेलाबाट थोरै पर चउरमा लगेर दुवै जनाले वसन्तको पेटमा छुरा प्रहार गरेर भागेका थिए,’ उनले भने।

घटनापछि दिपक र अमित दुवै जना गाउँमै घुमिरहेका थिए। बिहीबार राति ११ बजे गाउँबाटै दुवैलाई पक्राउ गरिएको डिएसपी गिरीले जानकारी दिए।

वसन्तको शव पोष्टमार्टमका लागि जलेश्वर अस्पतालमा राखिएको छ। घटनाबारे थप अनुसन्धान भइरहेको जिल्ला प्रहरी कर्यालय महोत्तरीले जनाएको छ।