पोखरा । चोरेको मोबाइलको मूल्य १७ सय रुपैंयाको हो । तर, चोरी गर्नेले २ हजार जरिवाना र विगो १ हजार ७ सय २० तथा पीडित राहत कोषमा २ सय बुझाउनुपर्ने फैसला जिल्ला अदालत कास्कीबाट भयो । यति रकम बुझाउन नसक्दा चोरीमा संलग्न दिपेश श्रेष्ठ जेल चलान भएका छन् ।

घटना विवरणः

अन्नपूर्ण गाउँपालिका ७ का २३ वर्षीय दीपेश श्रेष्ठले गत असोज २५ गते महानगरपालिका वडा नम्बर ९, नयाँबजारको एक पसलबाट दिउँसो साढे ३ बजेतिर रेडमी कम्पनी मोबाइल चोरी गरेका थिए । हाल नयाँबजार नै बस्ने दीपेशलाई मोबाइलसहित सोही दिन नै वडा प्रहरी कार्यालय, बैदामले पक्राउ गरेको थियो ।

त्यसपछि, प्रहरी हिरासतमा अनुसन्धानको सिलसिलामा रहँदाको अवधिले शुक्रबार २२ दिन जेल सजाय कट्टा भएको थियो । तर, अदालतले गरेको जरिवाना बुझाउन नसकेपछि दीपेश शुक्रबार नै जेल चलान भएको वडा प्रहरी कार्यालय, बैदाम प्रहरी प्रमुख डीएसपी राजेन्द्र श्रेष्ठले जानकारी दिए ।  ।

अदालतले जरिवाना रकम कट्टा हुने गरी थप ७ दिन थुनामा राख्न आदेश दिएको छ । अब उनी दैनिक ३ सयका दरले कट्टा हुने गरी ७ दिन कारागार बस्नेछन् । जरिवाना बापतको रकम दाखिला गर्न नसक्दा उनी जेल चलान भएका हुन् ।

अदालतकाे आदेशसँगै चोरीमा संलग्न दिपेशलाई कारागार कार्यालय कास्की सचालन गरिएको कास्की प्रहरीले जानकारी दिएको छ ।