लामो समय देखि बहुप्रतिक्षित कोरला नाका यहि नोभेम्बर १३ तारिख अर्थात् कार्तिक २७ गते खुल्ला हुने भएको छ ।

चिनको तिब्बत स्वशासित क्षेत्रका चिनियाँ कम्युनिस्ट पार्टीका सचिव वाङ जुनझेङको समुपस्थितिमा नाकाको शुभारम्भ गरिने कार्यक्रम तय भएको पोखरा महानगरपालिकाका मेयर धनराज आचार्यले जानकारी दिएका छन् ।

उनले यो अत्यन्तै खुशीको कुरा भएको बताउँदै यस कार्यमा पहल प्रयत्न गर्ने सबै प्रति धन्यवाद ज्ञापन गरेका छन् । साथै, यस नाकाको चिन तर्फको क्षेत्रमा पोखरा महानगरपालिकाक‍‍‍ो प्रतिनिधि मण्डलले अध्ययन अवलोकन गरेको पनि बताएका छन् ।

सोहि क्षेत्रबाट प्रतिनिधित्व गर्ने गण्डकी प्रदेशका निवर्तमान सभासदस्य इन्द्रधारा विष्टका अनुसार नाकाको नेपाली समयानुसार बिहानको १० बजे अर्थात् चिनियाँ समयानुसार दिउँसो १ बजे उद्घाटनका निम्ति तयारी भइरहेको छ ।

पर्वको छेको पारेर केही दिन खुल्ने सो नाकामा नेपाल र चीन दुवैतिरका स्थानीय ३० किलोमिटरसम्म आवतजावत र व्यापार व्यवसाय गर्न पाउने छन् ।

भन्सार चल्ने गरी होइन, पहिले झैं स्थानीयका लागि पर्वका बेला खोल्ने तयारी

यद्यपी, भन्सार नै चल्ने गरी खुल्न लागेको भने होइन । पहिलेजस्तै स्थानीयका लागि पर्वको बेला खोल्ने तयारी भएको बताइन्छ ।

सो कार्यक्रममा सहभागिताका लागि लो–घेकर दामोदरकुण्ड गाउँपालिका र लोमान्थाङ गाउँपालिकाका स्थानीय व्यापारी र सर्वसाधारण स्थानीय बासिन्दाहरुलाई आमन्त्रण गरिएको छ ।

जिल्ला प्रशासन कार्यालय मुस्ताङले प्रदान गरेको सीमा पास कार्ड र नेपाली नागरिकताको सक्कल प्रमाण पत्र अनिवार्य साथमा लैजानुपर्ने बताइएको छ ।

केही दिनका लागि सो नाका खुल्ने भएपछि लो–घेकर, दामोदरकुण्ड गाउँपालिकाका र लोमन्थाङ गाउँपालिकाकाका स्थानीय तथा मुस्ताङबासीहरु हर्षित् बनेका छन् । केहि वर्षदेखि नाका बन्द थियो ।

चीन तर्फबाट ठूला ठूला पक्की संरचनाहरु भने बनिसकेका छन् । भन्सार नै चल्ने गरी उतातर्फ तयार भइसकेको अवस्थामा नेपाल तर्फ भने केही काम भएको छैन ।