गत वर्ष माघ १ गते पोखरामा भएको यति एयरलाइन्स विमान दुर्घटनामा निधन हुनुभएका पोखराका पत्रकारद्धय त्रिभुवन पौडेल र अनिल शाहीको सम्झनामा ‘स्मृति दर्पण’ प्रकाशन गरिएको छ ।

प्रेस सेन्टर नेपाल गण्डकी प्रदेश समितिले प्रकाशन गरेको स्मृति ग्रन्थ पुस्तकको प्रधानमन्त्री पुष्पकमल दाहाल (प्रचण्ड)ले विमोचन गरेका हुन् । प्रेस सेन्टरको विरगञ्जमा सम्पन्न २० औँ स्थापना दिवस समारोहका अवसरमा सोमबार स्मृति दर्पण विमोचन गरिएको हो ।

पुस्तकमा स्व. पत्रकारद्धयको जिवनी, विभिन्न पत्रकार तथा पत्रकार सम्वद्ध संघ संस्थाका अध्यक्ष तथा सञ्चारकर्मीहरुले उनीहरुसँगको सहकार्यलाई किताबमा उल्लेख गरेका छन् ।

स्मारिकामा गण्डकी प्रदेश क्षेत्रमा विभिन्न समयमा ज्यान गुमाउनुभएका पत्रकारहरुको पनि सङ्क्षिप्त परिचय समेटिएको छ । प्रेस सेन्टर नेपालका केन्द्रीय उपमहासचिव एवं गण्डकीका इन्चार्ज दीपक श्रेष्ठले दुर्घटनामा गुमाएका पौडेल र शाहिको सम्झना र सम्मानमा स्मृति ग्रन्थ प्रकाशन गरिएको बताए ।

प्रेस सेन्टरका केन्द्रीय उपाध्यक्ष समेत रहेका स्व.  पौडेल नेपाल पत्रकार महासङ्घको केन्द्रीय सदस्य समेत थिए । उनीगण्डकी प्रदेश समितिको संस्थापक अध्यक्ष तथा कास्की शाखामा तीन कार्यकाल पदाधिकारीमा रहेर काम गरेका थिए ।

महासङ्घ प्रदेश समितिले पौडेलको स्मृतिमा रु १० लाखको अक्षयकोष स्थापनाको तयारी गरेको छ । कोषमा पत्रकार, विभिन्न सङ्घ संस्था तथा व्यक्तिहरुबाट रकम जम्मा भइरहेको बताइन्छ ।

यसैगरी, प्रदेश समितिका अध्यक्षको कार्यकक्षलाई ‘त्रिभुवन स्मृति कक्ष’ नामकरण गरिएको छ । पौडेल अध्यक्ष रहेका समयमा प्रदेश समितिको कार्यालय निर्माण गरिएको थियो ।

उक्त अवसरमा प्रेस सेन्टर कास्कीका अध्यक्ष कृष्ण दवाडीलाई सम्मान गरिएको छ । राससमा आबद्ध दवाडीलाई क्रियाशील पत्रकारिता पुरस्कारबाट सम्मान गरिएको हो । प्रधानमन्त्री प्रचण्डले उनलाई नगदसहित सम्मान गरे ।