पोखरा । गण्डकी प्रदेशका नवनियुक्त मुख्यमन्त्री खगराज अधिकारीले आजै सपथ लिने भएका छन् ।

दिउँसो ३ बजेपछि प्रदेश प्रमुख निवासमा सपथ लिने कार्यतालिका रहेको प्रदेश प्रमुखका प्रेस संयोजक रञ्जन अधिकारीले जानकारी दिए ।

मुख्यमन्त्री खगराज अधिकारीले आफूसँगै अन्य दुई मन्त्रीलाई साथमा लिएर सपथ ग्रहण गर्न लागेका हुन् । अधिकारी निकट श्रोतका अनुसार माओवादीबाट संसदीय दलका नेता हरिबहादुर चुमान र स्वतन्त्र सांसद राजीव गुरुङ उर्फ दीपक मनाङेले मुख्यमन्त्री अधिकारीसँग सपथ लिन लागेका हुन् ।

दुवै जनाले कुन मन्त्रालयको जिम्मेवारी लिने अहिले खुलेको छैन । स्रोतका अनुसार मुख्यमन्त्री अधिकारीले प्रदेश सभाबाट विश्वासको मत लिनु अघि दुवैलाई विनाविभागीय मन्त्रीका रुपमा नियुक्त गर्ने तयारी छ ।

 मनाङे पाँचौँपटक गण्डकी प्रदेश सरकारको मन्त्री बन्ने भएका छन् । मनाङे कांग्रेस नेता सुरेन्द्रराज पाण्डे नेतृत्वको सरकारमा पनि भौतिक पूर्वाधार विकास तथा यातायात मन्त्री थिए । तर, अधिकारीलाई मुख्यमन्त्री बनाउन निर्णायक मत दिएर उनी पुनः मन्त्री बन्न लागेका हुन् । एमाले स्रोतका अनुसार उनले सामाजिक विकास तथा स्वास्थ्य मन्त्रालय मागेका छन् । सरकार बनाउन निर्णायक मत दिएकाले मुख्यमन्त्री अधिकारी पनि मनाङेलाई उक्त मन्त्रालय दिन तयार छन् ।

फाइल तस्वीर ।