स्याङ्जाको पुतलीबजार नगरपालिका -१ स्थित त्रिभुवन आदर्श नमूना माध्यमिक विद्यालयका सुशान्त मरासिनीले माध्यमिक शिक्षा परिक्षामा ४ जिपिए ल्याएका छन् । उनी ४ जिपिए ल्याउने जिल्लाकै एक्लो विद्यार्थी रहेका छन् ।

बिहीबार सार्वजनिक माध्यमिक शिक्षा परिक्षा(एसईई) २०८० को नतिजामा उनले ४ जिपिए ल्याएका हुन् । ४ जिपिए ल्याउने मरासिनी सानैदेखि उत्कृष्ट र लगनशील विद्यार्थी रहेको विद्यालयले जनाएको छ ।

विद्यालयका अनुसार एसईई परिक्षामा १ सय ४२ जना सम्मीलित भएकोमा ३.६ देखि ४ जिपिएसम्म ल्याउने १९ जना रहेका छन् । सरकारी विद्यालयमा ४ जिपिए ल्याउनुमा विद्यालयको गौरव उच्च बनेको विद्यालयले जनाएको छ ।

स्याङ्जाबाट चार हजार ७२ जनाले एसईई दिएकोमा एक हजार ७ सय ७१ जना उत्तीर्ण र ननग्रेड प्राप्तमा दुई हजार ३ सय १ जना विद्यार्थी रहेको शिक्षा विकास तथा समन्वय इकाई स्याङ्जाका अधिकृत एवं सूचना अधिकारी सुरेश सुवेदीले जानकारी दिए ।

उनका अनुसार साधारणतर्फ उत्तीर्ण भएका एक हजार ७ सय २२ जनामध्ये ३.६ देखि ४ जिपिए प्राप्त गर्ने १७२ जना, ३.२ देखि ३.६ जिपिए प्राप्त गर्ने ४४१ र ७१२ जनाले २.८ देखि ३.२ जिपिए प्राप्त गरि उत्तीर्ण भएका छन् । यसैगरी, २.४ देखि २.८ जिपिए प्राप्त गर्ने ३७७ जना र २० जनाले २.० देखि २.४ जिपिए ल्याएका छन् भने दुई हजार १ सय ९२ जनाले ननग्रेड प्राप्त गरेका छन् ।

त्यस्तै, प्राविधिकतर्फ दुई जनाले ३.६ देखि ४ जिपिए, १७ जनाले ३.२ देखि ३.६ जिपिए, २४ जनाले २.८ देखि ३.२ जिपिए र ६ जनाले २.४ देखि २.८ जिपिए प्राप्त गर्ने ४९ जना उत्तीर्ण भएका छन् भने १०९ जनाले एनजी अर्थात् ननग्रेड प्राप्त गरेका छन् ।