नेपाली कांग्रेसका सभापति एवं पूर्व प्रधानमन्त्री शेरबहादुर देउवाले पार्टी केन्द्रीय कार्यसमितिको पदाधिकारी र पूर्व पदाधिकारी बैठकमा नेकपा (एमाले) का अध्यक्ष केपी शर्मा ओलीसँगको भेटवार्ताबारे ब्रिफिङ गरेका छन् ।

आज (सोमबार) बसेको बैठकमा देउवाले आफूलाई ओलीले चिया खान भनेर बोलाएको र आफू गएको बताए । उनले ओलीसँग सौहार्दपूर्ण वातावरणमा छलफल भएको र अहिले आफूहरुबीचको सम्बन्ध सकारात्मक र सुमधुर रहेको पनि जानकारी गराए ।

‘उहाँले चिया खान बोलाउनुभयो । हामी गयौं, बस्यौं । सौहार्दपूर्ण वातावरणमा कुराकानी भयो । अहिले हाम्रो सम्बन्ध सकारात्मक र सुमधुर छ,’– बैठकमा देउवाले गरेको ब्रिफिङ सुनाउँदै प्रचार विभाग प्रमुख मीन विश्वकर्माले भने ।

बैठकमा नेताहरूले बजार हल्लाबारे सभापति देउवासँग जानकारी मागे । तर देउवाले यसबारे मुखै नखाेलेकाे बैठकमा सहभागी एक पदाधिकारीले जानकारी दिए ।

उनका अनुसार ‌देउवाले एमाले अध्यक्ष ‌ओलीले चिया खान बाेलाएपछि बीआरआईबारे छलफल भएकाे मात्रै बताए ।

‘नयाँ सत्ता समीकरणबारे केही बोल्दै बोल्नुभएन। ५ बजे अर्को कोही मान्छे भेट्न आउँदै छ भनेर बैठक छिटो सक्नतिर लाग्नुभयो । बोल्दै नबोले पनि केही तयारी हो कि जस्तो देखिन्छ । सभापतिले मुखै खोल्नुभएन’, उनले भने ।

उनका अनुसार पछिल्लाे राजनीतिक घटनाक्रमबारे उपसभापति तथा महामन्त्री कसैलाई पनि जानकारी छैन । ‘देउवाले प्रमुख सचेतक रमेश लेखकलाई खटाए जस्तो देखिएकाे छ,’ उनले भने ।