पोखरा महानगरपालिकामा अख्तियार दुरुपयोग अनुसन्धान आयोगले छापा हानेको छ । आयोगको टोलीले आज (मंगलबार) महानगर कार्यालयमा छापा हानेको हो ।

मणिपाल शिक्षण अस्पताललाई नियमविपरीत २० करोड रुपैयाँ राजस्व छुट दिएको भन्दै अख्तियारमा उजुरी परेको थियो । उक्त उजुरीमाथि छानबिन गर्न अख्तियारको टोलीले महानगर कार्यालयमा छापा हानेर कागजात नियन्त्रणमा लिएको छ ।

अख्तियारले कार्यपालिका बैठकको निर्णय, राजस्वसम्बन्धी अहिलेसम्म भएका निर्णय, राजस्व परामर्श समितिको निर्णय, नक्सापासलगायतका मणिपाल शिक्षणसँग सम्बन्धित कागजात नियन्त्रणमा लिएको हो ।

महानगरको कार्यपालिका बैठकबाट निर्णय गराएर १९ करोड ८१ लाख छुट दिइएको विषयमा समाचार बाहिरिएको थियो । यस सम्बन्धमा तीव्र आलोचना भएपछि सो निर्णय बदर गरेर महानगर आफैले छानविन समिति बनाएको जनाएको छ ।

महानगरपालिकाको २०७९ चैत १० मा बसेको १६ औं बैठकले १ करोड ७५ लाख ५३ हजार रुपैयाँ मात्र राजस्व लिएर नक्सा पास दिने निर्णय गरेको थियो ।

महालेखाको २०७६/७७ को प्रतिवेदनले मणिपाल अस्पतालले बनाएका भवनको नक्सा पास र जरिवानासहित २१ करोड ५७ लाख ११ हजार ७९८ रूपैयाँ राजस्व असुल गर्न भनेको थियो ।

२०७९/८० को महालेखाको प्रतिवेदनले पनि मणिपाललाई भारी छुट दिइएकोमा प्रश्न उठाएपछि यो विषय बाहिर आएको थियो ।

यस विषयमा मणिपाल शिक्षण अस्पतालले भने कुनै गल्ती कमिकमजोरी नगरेको बताएको छ । मणिपालले महानगरकातर्फबाट समयमै भवन निर्माणको सम्पन्नताको प्रमाणपत्र प्राप्त नहुँदा यो समस्या बढ्दै गएको जनाएको छ । अस्पतालले नियमपूर्वक तिर्नुपर्ने सबै राजश्व तिरेको जनाएको छ ।