सुरिलो स्वरका धनी  गायक प्रकाश तिमिल्सिनाको निधन भएको छ । दृष्टिविहीन गायक तिमिल्सिनाको शनिबार साँझ निधन भएको हो ।

संगीतकार वसन्त सापकोटाका अनुसार उनी भैंसेपाटी स्थित घरमै बेडमा अचेत अवस्थामा फेला परेकोमा परिवारले पाटन अस्पताल पुर्‍याएको थियो । अस्पताल पुर्‍याउँदा चिकित्सकले मृत घोषणा गरेका हुन् ।

गायन प्रतियोगिता नेपाली ताराबाट उदाएका प्रकाशका ‘प्रिय तिम्रो सिउँदोमा सिन्दुर भर्न देऊ…’ लगायत दर्जनौं गीत लोकप्रिय छन् । यस गीतले २०६५ सालमा अन्नपूर्ण म्यूजिक अवार्ड र कालिका म्यूजिक अवार्ड जिताएको थियो ।

विशेषगरी राजनराज शिवाकोटीले दिएका गीतहरु नै उनको हिट भयो । तिम्रै हात सिन्दुर, खल्ली, तिमीलाई देखेर लगायतका दर्जनाैँ गीत हिट छन् । प्रकाशको अन्तिम संस्कार आइतबार बिहान पशुपति आर्यघाटमा गर्ने तयारी रहेको संगीतकार अर्जुन पोखरेलले जानकारी दिए ।

उनको पारिवारिक जीवन अत्यासलाग्दो छ । २०४५ सालमा कोशीमा आएको बाढीले घर परिवार सबै गुमाएका उनले आँखाको ज्योति पनि गुमाएका थिए । ३ वर्षको उमेरमा बाढीले बगाउँदा धेरै तल माझीले जालमा पारेर उनलाई निकालेको र पछि हजुरआमाले पालेको प्रकाशले अन्तर्वार्ताहरुमा बताएका छन् ।

उनी आँखाको उपचारका लागि लामो समयदेखि अमेरिका जाने प्रयासमा थिए । उनका दुवै आँखाको दृष्टि थिएन । २० भन्दा बढी भाषामा गीत गाउन सक्ने उनी विश्व रेकर्ड राख्न लागिपरेको पनि बुझिन्छ ।