गण्डकी प्रदेशमा नयाँ सत्ता समिकरण अनुसार सरकार बन्न नसकिरहँदा संघीय सरकारका प्रवक्ताले असन्तुष्टि व्यक्त गरेका छन् ।

यहाँ सत्तारुढ दलहरू बीचको किचलोप्रति सञ्चार तथा सूचना प्रविधिमन्त्री पृथ्वीसुब्बा गुरुङले कडा टिप्पणी गर्दै मुख्यमन्त्री सुरेन्द्रराज पाण्डेले गलत गरिरहेको बताए ।

शनिबार पोखरामा प्रेस चौतारी गण्डकीको पत्रकार सम्मेलनमा भने, ‘कहीँ नभएको जात्रा गण्डकीमा भइरहेको छ ।’

उनले असन्तुष्टि व्यक्त गरेको मुख्य विषय यसअघिकै सरकारमा सहभागी भएका दिपक मनाङे र फणीन्द्र देवकोटालाई पुन: सरकारमा सहभागी गराउनु हो ।

उनले केन्द्रकै समीकरण अनुसार प्रदेश सरकार गठन हुनुपर्ने भन्दै दु:खमा साथ दिएको भनेर समीकरणभन्दा बाहिरकोलाई मन्त्री बनाउन नहुने तर्क गरे ।

मुख्यमन्त्री सुरेन्द्रराज पाण्डेले गलत काम गरिरहेको बताउँदै मन्त्री गुरुङले गण्डकी सरकार कसैको निजी कम्पनी नभएको बताए ।

‘मलाई दु:खमा साथ दिएको भन्नुहुन्छ । यो उहाँको निजी शासन हो र ? उहाँले प्राइभेट कम्पनी चलाएको होइन होला नि !’, उनले भने, ‘अहिले त माथिको समीकरण हुनुपर्छ । उहाँले त अगाडिको प्रणाली चलाइरहनुभएको छ, यो गलत कुरा हो ।’

मुख्यमन्त्री पाण्डेले आफूलाई साथ दिएका व्यक्तिलाई मन्त्री कायमै राख्न चाहेको भए कांग्रेसकै भागबाट राख्न सुझाव दिए । उनले भने, ‘पहिले सहमति गर्ने ४/४ भाग पर्‍यो भने त्यसभित्रबाटै उहाँले मिलाउने हो । यसमा हाम्रो धेरै टाउको दुखाई छैन ।’

यसअघि कांग्रेसका कृष्णचन्द्र नेपाली पोखरेल मुख्यमन्त्री हुँदा बनाइएको १२ वटा मन्त्रालयलाई एमालेका खगराज अधिकारी आएपछि ७ वटामा झारेका थिए ।

त्यसपछि २ पटकसम्म सर्वोच्चमा मुद्दा दायर गरेर ठूलो दलको नेताका हिसाबले अदालतको आदेशअनुसार नै नियुक्त भएका मुख्यमन्त्री पाण्डेले दीपक मनाङे र फणीन्द्रको सहयोगमा विश्वासको मत पाएका थिए ।

मुख्यमन्त्री पाण्डेले तिनै फणीन्द्र र मनाङेलाई जसरी पनि मन्त्री कायमै राख्न खोज्दा सत्तारुढ दलबीच भागबन्डामा सहमति हुनसकेको थिएन । उनीहरू दुवैजना केन्द्रको सत्ता समीकरण बाहिरका सांसद हुन् ।

माओवादी दलकै चुनाव चिन्ह लिएर चुनाव लडेका नेपाल समाजवादी पार्टीका फणीन्द्रकै कारण काँग्रेसका पाण्डे सरकारले विश्वासको मत प्राप्त गर्दै निरन्तरता पाएको थियो ।

मनाङेले पनि पुनः पाण्डे पाण्डेलाई साथ दिँदा एमाले र माओवादी विपक्षी कित्तामा पुगेको थियो । त्यसैले एमाले फणीन्द्रप्रति अनुदार छ ।