अविरल वर्षाका कारण देशका विभिन्न स्थानमा विपद्का घटनामा हालसम्म चौबिस घण्टा नबित्दै ११ जनाको मृत्यु भएको छ ।

सशस्त्र प्रहरीले शुक्रबार अपरान्ह ४ बजेदेखि शनिबार बिहान ९ बजेसम्म ९ जनाको मृत्यु भएको जनाएकोमा राष्ट्रिय अनुसन्धान विभागले भने काभ्रेमा थप २ जनाको मृत्यु भइसकेको जनाएको छ ।

बाढीपहिरालगायत विपद्मा परी सात जना घाइते र ११ जना बेपत्ता भएको केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिए । ललितपुर स्थित नख्खुखोलाको बाढीले बगाएर एकै परिवारका बच्चासहित ४ जनालाई हेर्दाहेर्दै बगाएर बेपत्ता बनाएको छ ।

पहिरोबाट पाँचथर, धनकुटा, काभ्रेपलाञ्चोक र ललितपुरलगायत जिल्लामा केही घर पुरिँदा मानवीय क्षति भएको छ । बाढी–पहिरोमा परेर धनकुटामा दुई, पाँचथरमा दुई, काभ्रेमा तीन, झापामा एक र ललितपुरमा एक जनाको मृत्यु भएको सशस्त्र प्रहरीले पुष्टि गरेको छ ।

बाढीपहिरामा बेपत्ता भएकाको खोजी जारी छ । पछिल्लो विपद्बाट करिब चार सय नागरिक विस्थापित भएका र विस्थापितलाई सुरक्षित स्थानमा स्थानान्तरण गरिएको उनको भनाइ छ । उद्धार गरिएका नागरिकको व्यवस्थापनमा तदारुकताका साथ काम भइरहेको छ ।

प्रहरी प्रवक्ता कार्कीका अनुसार एक सय ५० भन्दाबढी स्थानमा बाढीपहिरालगायत विपद्का घटना भएका छन् ।

२८ स्थानमा प्रायः सबै राजमार्ग, मुख्य सडकमार्गहरु अवरुद्ध छन् । अवरुद्ध सडक खुलाउन सबै निकायसँग समन्वय भइरहेको प्रहरी नायब महानिरीक्षक कार्कीले बताए ।

काठमाडौंको वाग्मती, विष्णुमति, हनुमन्तेलगायत खोलामा जलसतह बढेपछि करिडोरका सडक प्रायः बन्द भएका छन् । सबै खोलामा करिडोर सडकमा पानी उक्लने अवस्था बनेको छ ।