स्याङ्जाको अर्जुनचौपारी गाउँपालिकामा नेपालकै पहिलो नवग्रह मन्दिर निर्माण हुँदै छ ।

अर्जुनचौपारी गाउँपालिका वडा नं.१ पञ्चकन्या धार्मिक वन केटीचौर (सिमलचौर) मा अवस्थित पञ्चकन्या देवी मन्दिरको नजिकै नवग्रह (नौ आकाशीय पिण्ड) मन्दिरको निर्माण कार्य तीव्र रुपमा अगाडि बढेको छ ।

नेपाल र भारतका सिद्धिप्राप्त विभिन्न साधुसन्त योगीहरुको परिकल्पना र सहयोगमा गाउँपालिकाको नेतृत्वमा नवग्रह मन्दिरको निर्माण कार्य अगाडि बढाइएको हो ।

नयाँ धार्मिक गन्तव्यको रुपमा विकास भइरहेको यस ठाउँमा निर्माण हुँदै गरेको नवग्रह मन्दिर वरपर गणेश चतुर्थीको अवसरमा १०८ वटा पिपलका बिरुवा रोपिएको थियो ।

नेपालमै पहिलोपटक अर्जुनचौपारीमा बन्दै गरेको नवग्रह मन्दिर भारतको असमको चित्रसालको पहाडमा मात्र रहेको छ ।

अर्जुनचौपारीमा बन्दै गरेको मन्दिर भारतको असमको भन्दा फरक रहेको बताउँदै पालिका अध्यक्ष प्रकाश तिवारीले यहाँ बन्ने नवग्रह मन्दिर विश्वमै पहिलो भएको दाबी समेत गरे ।

दियो आकारको पूर्वतर्फ फर्केको मन्दिर बन्ने बताउँदै पालिका अध्यक्ष तिवारीले पालिकालाई हिन्दु धर्मावलम्बीको केन्द्र बनाउने लक्ष्य रहेको बताए ।

मन्दिर गण्डकी प्रदेश सरकारको ४० लाख र बाँकी पालिकाको लगानीमा निर्माण हुँदै छ । गाउँपालिकाका अध्यक्ष तिवारीका अनुसार यो पवित्र स्थल निर्माणका लागि पालिकाले सहयोगदाताहरुको सहयोग समेत रहने अपेक्षा राखेको छ ।

यस मन्दिरमा नौवटा भुजा रहने पिल्लरमा १३ फिटको उचाइमा नवग्रहका नौवटै मूर्ति रहनेछन् भने त्यसमाथि १४ फिटको उचाइमा रहने पिल्लरमा चतुर्भुज आकारको सूर्यतर्फ फर्केको ग्रहको प्रतिमा रहनेछ । मन्दिर परिसर भित्र बन्ने नौवटा सर्कलको बीचमा षट्कोण र त्यसको पनि बीचमा पशुपतिनाथको जस्तै पञ्चमूखी शिवलिङ्ग राखिनेछ भने शिवलिङ्ग ७ क्वीण्टलको रहनेछ ।

नौवटा सर्कल रहने मन्दिरको माथिबाट घुम्न थालेपछि पुछारमा रहने सुरुङको बाटोबाट बाहिर निस्कन मिल्नेछ । निर्माणकार्य सकिएपछि मन्दिरमा गणेश, कूलदेवता, इष्टदेवता, लक्ष्मी, दुर्गा, कालभैरव, हनुमानलगायतको पूजा गरेपछि नवग्रहको पूजा हुनेछ ।

हरेक वर्ष गणेश चतुर्थीको दिनमा मात्र सौर्यमण्डालीय ग्रहको प्रतिमा हेर्न पाइनेछ भने प्रत्येक साताको शनिबारमात्र यो मन्दिर दर्शन तथा नवग्रहको विधिवत पूजा गर्न पाइनेछ ।