पोखरा । पृथ्वीनारायण क्याम्पसले अन्तरसंकाय खेलकुद प्रतियोगिता संचालन भएको छ । यही १४ पुससम्म चल्ने प्रतियोगितामा पहिलो दिन बुधबार बिहान ५ किमी दौड प्रतियोगिता शुभारम्भ भयो ।

प्रतियोगिताको उद्घाटन क्याम्पस व्यवस्थापन समितिका सदस्य एवं पोखरा १ का वडाध्यक्ष शाहारा प्रधानले गरेका हुन् ।

५ किमी दौडमा छात्रतर्फ दर्पण थापा प्रथम, सरोज थापा मगर द्वितीय, आकाश मगर तृतीय र छात्रातर्फ समीक्षा पोख्रेल प्रथम, रोशनी केसी द्वितीय र प्रतिक्षा सुवेदी तृतीय भए ।

यसैगरी, पहिलो दिन नै भएको १०० मिटर दौडमा छात्रतर्फ सागर केसी प्रथम, अमृत शाही द्वितीय र अर्जुन पुन तृतीय भए । छात्रातर्फ स्नेहा गर्बुजा प्रथम, नन्दनी दास द्वितीय र समीक्षा पोख्रेल तृतीय भए ।

विजयी धावकलाई पदक, प्रमाणपत्र र नगद पुरस्कार प्रदान गरियो ।

प्रतियोगितामा लङजम्प छात्रछात्रा, क्रिकेट छात्र, भलिबल, फुटबल, बास्केटबल, टेबुलटेनिस, ब्याडमिन्टन अन्तर्गतका खेलहरु खेलाइने प्रतियोगिता संयोजक डा.बोधराज ढकालले बताए ।

बास्केटबल छात्र र छात्रामध्ये छात्रतर्फ बिबिएस पवन पुर्जाको समूह प्रथम र मनीष तिलिजा पुनको समूह द्वितीय भए । छात्रातर्फ बिबिए रस्मिता गुरुङको समूह प्रथम र बिएस्सी आकृति गर्वुजाको समूह द्वितीय भयो ।

ढकालका अनुसार क्रिकेटमा ८ टिम, भलिबल छात्र ९ र छात्रा ८ टिम, बास्केटबाल छात्र ५ र छात्रा ६ टिम, फुटबल छात्र ९ र छात्रा ६ टिम, ब्याडमिन्टनमा छात्र ४० र छात्रा १७, टेबुल टेनिसमा ५०, लङजम्प १५ एवं दौडतर्फ ७० जना विद्यार्थीहरुले भाग लिएका छन् ।

क्याम्पसले गत वर्ष भिसी कप प्रतियोगितामा विश्वविद्यालयमा द्वितीय स्थान हासिल गरेको थियो । यस वर्ष गण्डकी प्रदेशस्तरीय त्रिवि आंगीक क्याम्पस छात्रा भलिबल प्रतियोगितामा पनि पृथ्वीनारायण क्याम्पसले द्वितीय स्थान हासिल गरी नगद ३३ हजार पुरस्कार पाएको थियो ।