अर्जुनचौपारी गाउँपालिकाभित्रका स्वास्थ्यकर्मीहरुलाई एचपिभी खोपसम्बन्धी अभिमुखिकरण कार्यक्रम गरिएको छ । बिहिबार गाउँपालिकाको स्वास्थ्य शाखाले पालिकाभित्रका खोप दिने स्वास्थ्यकर्मीहरुलाई एचपिभी खोपसम्बन्धी अभिमुखिकरण कार्यक्रम गरेको हो ।

यहि माघ २२ देखि २५ गतेसम्म पालिकामा सञ्चालन हुने खोप अभियानमा यहाँका १० वर्षदेखि १४ वर्ष उमेरसम्मका किशोरीहरुलाई खोप लगाइने स्वास्थ्य शाखा प्रमुख इन्द्रबहादुर नेपालीले जानकारी दिए । कक्षा – ६ देखि १० सम्मका छात्राहरु साथै लक्षित उमेर समूहमा रहेका विद्यालय नजाने किशोरीहरु गरी अर्जुनचौपारी गाउँपालिकामा चार सय ३७ जनालाई खोप लगाइने प्रमुख नेपालीले बताए ।

महिलाहरुको पाठेघरको मुखको क्यान्सर रोकथाम तथा नियन्त्रणका लागि पालिकाका ९ वटा खोप केन्द्रबाट स्वास्थ्यकर्मी तथा स्वयंसेवकको सहयोगमा एचपिभी खोप लगाइने उनले बताए ।

अहिले यहाँका विद्यालयमा अध्ययनरत विद्यार्थीहरुलाई विद्यालयमा पुगेर माघको २२, २३, २४ र २५ गते खोप दिइने र लक्षित उमेर समूहमा रहेका विद्यालय नजाने किशोरीहरुलाई परिचय खुल्ने कागजपत्रसहित पायक पर्ने विद्यालयमा र अन्त्यमा यहाँका ६ वटै स्वास्थ्य संस्थामा खोप लगाउने व्यवस्था गरिएको स्वास्थ्य शाखा प्रमुख नेपालीको भनाइ छ ।

जिल्लाका ११ वटै स्थानीय तहले समेत आफ्ना स्वास्थ्यकर्मी, स्वयंसेवक तथा खोप कार्यकर्तालाई खोपसम्बन्धी अभिमुखिकरण गर्दै आएका छन् । यद्यपि, यसअघि प्रदेश जनस्वास्थ्य कार्यालय पुतलीबजार स्याङ्जाले विभिन्न ग्रुपमा विभाजन गरी सरोकारवालाहरुलाई जिल्ला स्तरीय अभिमुखिकरण कार्यक्रम गरिसकेको छ ।