पोखरा । रास्वपा सभापति एवं पूर्व गृहमन्त्री रवि लामिछाने हिरासतमा सुतिरहेको तस्वीर खिचेर सार्वजनिक गर्ने डा. निकोलस भुसाल ५० हजार धरौटीमा रिहा भएका छन् ।

कास्की जिल्ला अदालतका न्यायाधीश शंकरबहादुर राईको इजलासले निकोलसलाई ५० हजार धरौटीमा रिहा गर्न आदेश दिएको हो ।

कास्की प्रहरीको अनुसन्धान पश्चात् सहकारी वकिल कार्यालय कास्कीले  विरुद्ध विद्युतीय कारोबार ऐनविरुद्धको कसुर (साइबर अपराध कसूर) मा मुद्दा दर्ता गराएको थियो ।

बिहीबार दोस्रोपटक पक्राउ परेका भुसाल विरूद्ध शुक्रबार जिल्ला अदालत कास्कीमा मुद्दा दर्ता भएको प्रहरीले जनाएको छ । जिल्ला अदालत कास्कीमा शुक्रबार नै बयान गराएर थुनछेक बहस गरिएको हो ।

सरकारी वकिलको कार्यालयले प्रहरी अनुसन्धानका क्रममा थप तथ्य पुष्टि भएको भन्दै शुक्रबार अभियोजन पत्र दर्ता गरेको हो । प्रहरी कन्ट्रोल रूममा रहेका प्रहरी काममा व्यस्त रहेको बेलामा अनधिकृत रुपमा सीसीटीभी मनिटरबाट लामिछाने सुतिरहेको तस्वीर खिचेर सामाजिक सञ्जालमा राखेको अभियोजन पत्रमा उल्लेख छ ।

जिल्ला प्रहरी कार्यालय कास्कीको सुरक्षा संवेदनशीलतामा र मुद्दाको अनुसन्धान तथा अभियोजनसमेतमा आँच पुर्‍याउने, गोपनियता भंग हुने सामग्री प्रकाशन गरी विद्युतीय सञ्चार माध्यमको दुरुपयोग गरेर  सुरक्षामासमेत प्रभाव पार्ने काम गरेको हुँदा कानुनअनुसार कारबाही हुनुपर्ने माग गरिएको छ ।

एक लाख रुपैयाँसम्म जरिवाना वा पाँच बर्षसम्म कैद वा दुवै सजाय हुने कानुनी व्यवस्था अनुरूप यही व्यवस्थाअनुसार भुसाललाई कारबाही गर्न सरकारी वकिलको कार्यालयले अदालतमा मागदाबी गरेको छ ।

प्रतिवादी भुसालको साथबाट बरामद भएको मोबाइल र सिमकार्डसमेत परीक्षणको लागि नेपाल प्रहरी प्रधान कार्यालय, डिजिटल फरेन्सिक ल्याब काठमाडौंमा पठाइएको हुँदा त्यसको रिपोर्ट प्राप्त नभएकाले पछि पेश गरिने अभियोजन पत्रमा उल्लेख छ ।

भुसाल मंसिर २९ गते जिल्ला प्रहरी कार्यालय कास्कीमा रवि लामिछानेलाई भेट्न पुगेका थिए । यसअघि उनी गत ७ पुसमा पक्राउ परेका थिए । त्यतिबेला न्यायाधीश नवराज दाहालको इजलासले हिरासतबाहिरै राखेर अनुसन्धान गर्न आदेश दिएको थियो ।