पोखरा । लामो समय गण्डकीको स्वास्थ्य मन्त्रालयमा रहेका सचिव डा. विनोदविन्दु शर्मालाई सरुवा गरिएको छ ।

गण्डकी सरकार मन्त्रिपरिषदको बैठकले शर्मालाई प्रादेशिक स्वास्थ्य तालिम केन्द्रमा सरुवा गर्ने निर्णय गरेको थियो । शर्माको स्थानमा डा. विश्वबन्धु बगालेलाई ल्याइएको छ । उनको सोमबार पदस्थापन भएको छ ।

बगालेले यसअघि पनि गण्डकीकै स्वास्थ्य सचिवको जिम्मेवारी सम्हालेका थिए । २०७९ असोज ५ मा गण्डकीमा आएका बगाले करिब ३ महिना काम गरेर अध्ययन बिदामा बसेका थिए ।

केही महिना अध्ययन बिदामा बसेका बगालेलाई पुनः मन्त्रालयमै फर्काइएको हो । उनको दरबन्दी गण्डकी प्रदेशमै थियो । अहिले अध्ययन बिदा सकेर उनी फर्किएपछि उनी पहिलेकै मन्त्रालयमा पदस्थापन भएका छन् ।

डा. विनोदविन्दु पहिले पनि स्वास्थ्य सचिव नै थिए ।  तत्कालीन स्वास्थ्यमन्त्री मधुमाया अधिकारीसँग काम गर्दा लय पनि नमिलेपछि विनोदबिन्दुलाई मुख्यमन्त्री तथा मन्त्रिपरिषदको कार्यालयमा तानिएको थियो । झण्डै १ वर्षसम्म जिम्मेवारीविहीन रहेका विनोदबिन्दुले विश्वबन्धु अध्ययन बिदामा बसेपछि स्वास्थ्यमै फर्कने मौका पाएका थिए ।

अहिलेका स्वास्थ्य मन्त्री कृष्ण पाठकसँग समेत बिनोदबिन्दुको लय नमिलेपछि उनलाई तालिम केन्द्रमा धकेलिएको बताइन्छ । मिठा कुरा गर्ने तर कार्यसम्पादनमा अग्रसर हुनै नखोज्ने स्वभावका शर्मालाई पन्छाइएको बताइन्छ ।