११५ औँ अन्तराष्ट्रिय नारी दिवसको अवसरमा सामाजिक विकास कार्यालय स्याङ्जाले ‘सामाजिक नारी आवाज’ पुस्तिका विमोचन गरेको छ ।

पुस्तिकामा जिल्लाका विभिन्न क्षेत्रमा नेतृत्वदायी भूमिकामा रहेका महिलाहरुले महिला अधिकार, लैङ्गिक हिंसा अन्त्यलगायतका विषयवस्तु समेटिएर उनीहरुको विचार प्रकाशन गरिएको छ ।

पुस्तिकामा स्याङ्जा जिल्लाका विभिन्न विद्यालयमा अध्ययनरत छात्राहरुले लेखेको “लैङ्गिक हिंसाको अन्त्य” शीर्षक समेटिएको कविताहरु समेत समावेश गरिएको छ ।

विमोचन कार्यक्रममा पुतलीबजार नगरपालिका प्रमुख तुलसीराम रेग्मीले यस पुस्तिकामा स्याङ्जा जिल्लामा विभिन्न क्षेत्रमा नेतृत्वदायि भूमिकामा रहेका महिलाहरुको सशक्त विचार र बालिकाहरुको कविता समेटिएको हुँदा महिला अधिकार स्थापित गराउन महत्वपूर्ण भूमिका खेल्ने बताए ।

यस्तै, पुतलीबजार नगरपालिका उपप्रमुख देवी अर्यालले महिलाहरुको अधिकार, सशक्तिकरण, लैङ्गिक हिंसा विरुद्धको सचेतना, विद्यार्थीको प्रतिभा प्रस्फुटनमा महत्वपूर्ण भूमिका रहने विश्वास व्यक्त गरिन् ।

सामाजिक नारी आवाज पत्रिका एक सामाजिक, सांस्कृतिक र जागरुकता सम्बन्धी प्रकाशन भएको र यसले महिला अधिकार, समानता र सशक्तिकरण प्रवद्र्धनमा महत्वपूर्ण भूमिका हुने सामाजिक विकास कार्यालय स्याङ्जाका कार्यालय प्रमुख जीवन पौडेलले बताए ।

लैङ्गिक हिंसाको अन्त्य कसरी गर्ने विषयमा केन्द्रित रहेर महिला नेतृत्वको विचार र विद्यालयका छात्राहरुको कविता यसमा समावेश गरेको हुँदा लैङ्गिक हिंसा अन्त्यको लागि सामाजिक नारी आवाज एउटा महत्वपूर्ण पुस्तिका हुने कार्यालय प्रमुख पौडेलले विश्वास व्यक्त गरे ।

कार्यक्रममा सहायक प्रमुख जिल्ला अधिकारी दीपक पौडेल, जिल्ला सरकारी वकिल कार्यालयका जिल्ला न्यायाधीवक्ता श्रीकला पौडेल, जनप्रतिनिधि, महिला अधिकारकर्मी, प्रहरी तथा विभिन्न क्षेत्रका महिलाहरुको उपस्थिति रहेको थियो ।

हरेक वर्ष मार्च ८ मा मनाइने नारी दिवस यस वर्ष ‘सबै महिला तथा बालिकाको लागि: अधिकार, समानता र सशक्तिकरण” नाराका तय गरिएको छ ।