राष्ट्रिय लोक तथा दोहोरी गीत प्रतिष्ठान नेपाल स्याङ्जाद्वारा साहित्यकारलाई सम्मान गरिएको छ । प्रतिष्ठान स्याङ्जाले एक कार्यक्रमबीच साहित्यकार देवीप्रसाद उपाध्याय रेग्मी बनबासीलाई सम्मान गरेको हो ।

प्रतिष्ठानको २४ औं स्थापना दिवसका अवसरमा स्याङ्जाद्वारा वालिङ् नगरपालिकाको सभाहलमा गरिएको सम्मान तथा अग्रज स्रष्टाहरुको फोटो प्रदर्शनी कार्यक्रममा साहित्यकार बनबासीलाई सम्मानपत्रसहित दोसल्ला ओढाएर सम्मान गरिएको हो । साहित्यकार बनबासीलाई प्रतिष्ठानका केन्द्रिय महासचिव शिव हमाल, सचिव घनश्याम रिजाल लगायतले सम्मान गरेका हुन् ।

नेपाली लोक साहित्य र संस्कृति सम्बर्द्धनको क्षेत्रको विकासमा प्रोत्साहित गरेकोले साहित्यकार बनबासीलाई सम्मान गरिएको प्रतिष्ठान स्याङ्जाका अध्यक्ष नेत्र खड्काले बताए ।

कार्यक्रममा प्रतिष्ठान स्याङ्जाका संस्थापक अध्यक्ष गोपाल जिटी र डा. अच्युत शरण अर्यालले तयार पारेको कार्यपत्र ‘आँधीखोले लोक गीतका साधकहरु’ प्रस्तुत गरिएको थियो ।

उक्त कार्यपत्रमा अग्रज लोक गायकहरु चन्द्रबहादुर सेन ‘मसाने’, चन्द्रकान्त पाण्डे ‘पाँडे बा’, चेतन कार्की, कुलबहादुर राना, डिल बहादुर श्रेष्ठ, राजेन्द्र लम्साल क्षत्री र रत्न बानियाँको संक्षिप्त जीवनी र उनीहरुले लोक गीतको क्षेत्रमा पुर्‍याएको योगदानको चर्चा गरिएको थियो ।