प्रथम पिङ्क सिटी महोत्सव कप २०८१ को उपाधिका लागि गल्याङ नगरपालिका र बिरुवा गाउँपालिका भिड्ने भएका छन् ।

शनिबार भएको दोस्रो सेमिफाइनलमा बिरुवाले वालिङ् नगरपालिकालाई जितेसङ्गै गल्याङसङ्गको भेट पक्का गरेको हो । पहिलो सेट गुमाएको बिरुवाले वालिङ्लाई ३ – १ को सेटमा २४ – २६, २५ – २२, २५ – १७ र २५ – २३ अङ्कले जित निकालेको हो ।

वालिङ् खेलमैदानमा भएको पहिलो सेमिफाइनल खेलमा गल्याङ नगरपालिकाले भीरकोट नगरपालिकालाई ३ – २ को सेटमा पराजित गर्दै फाइनलमा प्रवेश गरेको हो । गल्याङले भीरकोटलाई २४ – २६, २५ – १९, २६ – २४, २५ – २० र १५ – १३ अङ्कले पराजित गरेको हो ।

वालिङ् चेम्बर अफ कमर्सद्वारा आयोजित प्रथम पिङ्क सिटी महोत्सव वालिङ् २०८१ को अवसरमा वालिङ् खेलमैदानमा सोमबारदेखि सुरु भएको प्रतियोगिताको विजेता टिमले एक लाख ५५ हजार रुपैयाँ र उपविजेताले एक लाख पाँच हजार रुपैयाँ नगदसहित शिल्ड, मेडल र प्रमाणपत्र पाउनेछन् ।

यस्तै, तेस्रो हुने टिमले ५५ हजार र चौथों हुनेले ३० हजार रुपैयाँ नगदसहित शिल्ड, मेडल र प्रमाणपत्र पाउनेछन् ।

प्रतियोगिता अवधिभर उत्कृष्ट खेल प्रदर्शन गर्ने खेलाडी मध्ये व्यक्तिगत विधातर्फ सर्वोत्कृष्ट खेलाडीलाई पाँच हजार रुपैयाँ नगद र बेस्ट स्पाइकर, बेस्ट सेटर, बेस्ट सर्भर, बेस्ट ब्लकर र बेस्ट डिफेन्डरलाई तीन/तीन हजार रुपैयाँ नगद प्रदान गरिने खेल संयोजक उमराज गुरुङले बताए ।

स्याङ्जा जिल्ला पालिका स्तरीय पुरुष भलिबल प्रतियोगितामा यहाँका छ वटा पालिकाको सहभागिता रहेको छ । प्रतियोगितामा वालिङ्, चापाकोट, गल्याङ, भीरकोट नगरपालिका र बिरुवा, कालीगण्डकी गाउँपालिकाको सहभागिता रहेको छ ।