पोखरा । पोखरामा आफू प्रहरी नायब उपरीक्षक (डिएसपी) हुँ भन्दै अभद्र व्यवहारमा संलग्न एक जना व्यक्ति पक्राउ परेका छन्।

पक्राउ पर्नेमा बाग्लुङको बाग्लुङ नगरपालिका वडा नम्बर ४ कुडुलेफेदी घर भएका ३२ वर्षीय चन्द्रकान्त पौडेल रहेको प्रहरीले जनाएको छ ।

पौडेलले आइतबार ७ गते राति करिब १० बजे पोखरा महानगरपालिका–८ स्थित सृजनाचोक स्थित ‘ढावा रेष्टुरेन्ट एण्ड बार’ मा खाना खाएपछि आफू डिएसपी भएको भन्दै पैसा नतिरी अभद्र व्यवहार गरेका थिए।

उनलले रेष्टुरेन्टमा अर्डर गरेर खानेकुरा खाएपछि काउन्टरमा कार्यरत कर्मचारीलाई धाक धम्की दिँदै अभद्र व्यवहार गरेका थिए।

घटनाबारे जानकारी प्राप्त हुनासाथ वडा प्रहरी कार्यालय बैदामबाट खटिएको प्रहरी टोलीले पौडेललाई नियन्त्रणमा लिएको हो।

पक्राउ परेका उनीविरुद्ध अभद्र व्यवहार सम्बन्धी मुद्दामा जिल्ला प्रशासन कार्यालयबाट १० दिनको म्याद थप गरी अनुसन्धान प्रक्रिया अघि बढाइएको प्रहरीले जनाएको छ ।