पोखरा । पृथ्वी नारायण क्याम्पस, इतिहास तथा संस्कृति विभागले विद्यार्थीका लागि ‘शोध-पत्र (थेसिस) प्रस्ताव लेखन सम्बन्धी कार्यशाला गोष्ठी’ आयोजना गरेको छ ।

पोखरा वडा नं. १६ स्थित पर्यटकीय स्थल ढिकीडाँडामा सञ्चालित दुई दिवसीय गोष्ठीमा इतिहास विषयमा स्नातकोत्तर चौथो तथा तेस्रो सेमेस्टरमा अध्ययनरत विद्यार्थी सहभागी रहेका थिए ।

गोष्ठीमा प्रमुख प्रशिक्षक सहप्राध्यापक अर्जुन बहादुर भण्डारी, सहप्राध्यापक डा. दीर्घमान गुरूङ, उपप्राध्यापक चन्द्रकान्त पौडेल, लक्ष्मण श्रेष्ठ, तोयनारायण देवकोटाले शोधप्रस्ताव लेखन विधिबारे प्रशिक्षण दिएका थिए ।

गोष्ठीमा निवर्तमान विभागीय प्रमुख सहप्राध्यापक बसन्तप्रसाद पराजुलीले शोधप्रस्ताव लेखनमा यो गोष्ठी लाभदायक रहने विश्वास व्यक्त गरे ।

विभागीय प्रमुख नारायण ढकालको अध्यक्षतामा भएको गोष्ठी शुभारम्भ कार्यक्रममा उपप्राध्यापक चन्द्रकान्त पौडेलले स्वागत र तोयनारायण देवकोटाले सञ्चालन गरेका थिए । विद्यार्थीका तर्फबाट बोल्दै विपिन आचार्यले कार्यशाला गोष्ठी निकै उपयोगी बनेको बताए ।

विभागीय प्रमुख ढकालले शोधप्रस्ताव लेखनको तयारीमा रहेका विद्यार्थीलाई लक्षित गरी आयोजित यस प्रकारको गोष्ठीले विद्यार्थीलाई लेखनमा सहजता मिल्ने बताउँदै विषयगत विज्ञ प्राध्यापकहरूको अनुभवलाई विद्यार्थीसँग बाँड्ने हेतु कार्यक्रम आयोजना गरेको बताए ।