`बाटो भीरको मलाई पिर रहेछ पचास तिरको …´ — यही मार्मिक बोलले सुरु हुने लोकगीत ‘बाटो भीरको’ पछिल्लो समय युट्युब, टिकटक र फेसबुकमा निकै चर्चामा छ ।

गायक सूर्य खड्का र गायिका निशा क्षेत्रीको आवाजमा सजिएको गीतले पाचँ दिनमै युट्युब ट्रेन्डिङको तेस्राे  स्थान कब्जा गरेको छ । नेपाली लोकसंगीतको स्वाद फेरि जनजनमा पुर्‍याएको छ।

गीतले विशेषगरी जीवनका पछिल्लो कालखण्डमा आइपर्ने चिन्ता, थकान, रित्तिएको भावना र गाउँघरको यथार्थलाई अत्यन्त गहिरो शैलीमा प्रस्तुत गरेको छ । `पचास तिरको´ उमेर समूहका मानिसहरूले भोग्नुपर्ने जिम्मेवारी, अपहेलना र सम्झनाको भावनालाई शब्दकार तथा संगीतकार शिव अखेलीले यथार्थपरक र हृदयस्पर्शी ढंगमा उतारेका छन् ।

संगीत संयोजन तारानाथ आचार्य, निर्देशन र छायांकन दुर्गा पौडेल, सम्पादन नविन घर्ती मगरले गरेका छन् । अभिनयमा सूर्य खड्का, स्मारिका ढकाल तथा सफल सापकोटाको सशक्त टिमवर्कले गीतलाई थप जीवन्त बनाएको छ ।

विशेष कुरा के छ भने गायक सूर्य खड्का, सर्जक शिव अखेली र संगीत संयोजक आचार्य तीनैजना बागलुङका हुन् जुन जिल्लालाई लोकगीत र मौलिक संस्कृतिको उर्वरभूमिका रूपमा चिनिन्छ ।

बागलुङकै माटोले हुर्किएका यी स्रष्टाहरूको सहकार्य यसअघि ‘दरबार’, ‘ढुङ्गेधारा’, ‘नैना रेशम’ लगायत थुप्रै हिट गीतमार्फत सफल भइसकेको छ ।

गीत सूर्य खड्काको अफिसियल युट्युब च्यानलमार्फत सार्वजनिक गरिएको हो । हाल गायक सूर्य जापान, सर्जक अखेली यूरोप र गायिका निशा क्षेत्री अस्ट्रेलियामा रहेका छन् । भौगोलिक दूरीले होइन, भावना र सिर्जनाले सँगै रहेका उनीहरूको गीतले अहिले लाखौं नेपालीको मन छोइरहेको छ ।

‘बाटो भीरको’ गीत न केबल एक मनोरञ्जन हो, यो उमेर, समय र अनुभवको गहिरो दस्तावेज हो जसले नेपाली लोकसंगीतलाई नयाँ धार दिँदै विश्वभर छरिएका नेपालीहरूलाई आफ्नै माटोको सुगन्ध सुनाइरहेको छ ।