नवलपुर । नवलपरासी (बर्दघाट–सुस्तापूर्व) को देवचुलीमा एम्बुलेन्स र स्कुल भ्यान ठोक्किँदा स्कुल भ्यानका चालकको मृत्यु भएको छ ।

दुर्घटनामा परी दुई विद्यार्थीसहित पाँचजना घाइते भएका छन् ।

सोमबार बिहान नारायणगढतर्फ बिरामी बोकेर जाँदै गरेको ना४च ४६१६ नम्बरको एम्बुलेन्स र विपरीत दिशामा जाँदै गरेको बा२०च ७२ नम्बरको स्कुल भ्यान देवचुली– २ स्थित दुम्कोली चोकमा ठक्कर खाँदा दुर्घटना भएको हो।

प्रहरीका अनुसार दुर्घटनामा परी दिव्य एकेडेमी बोर्डिङ स्कुल केउरेनीका भ्यान चालक देवचुली–१ का ५२ वर्षीय कुलप्रसाद सुवेदीको उपचारका क्रममा मृत्यु भएको हो । टाउको र दुवै खुट्टामा चोट लागेका सुवेदीको चितवनको भरतपुरस्थित चितवन मेडिकल कलेज शिक्षण अस्पतालमा उपचारका क्रममा आज बिहान ९ः२० बजे मृत्यु भएको प्रहरीले जनाएको छ।

दुर्घटनामा भएका घाइते र एम्बुलेन्सका बिरामीलाई चितवनको भरतपुरस्थित मनकामना अस्पताल पठाइएको प्रहरीले जनाएको छ।