त्रिकोणात्मक ट्वान्टी–२० अन्तर्राष्ट्रिय शृंखलाको दोस्रो खेलमा नेपालले स्कटल्याण्डलाई २ विकेटले पराजित गरेको छ ।

न्यून स्कोरको थ्रिलर बनेको खेलमा स्कटल्याण्डले दिएको लक्ष्य नेपालले १ बल बाँकी रहँदा पूरा गरेको हो ।

पहिले ब्याटीङ गरेको स्कटल्याण्डले ९८ रनको लक्ष्य दिएको थियो। ८ विकेट गुमाएर नेपालले १९.५ ओभरमा लक्ष्य पुरा गरेको हो।

सात विकेट गुमाएको नेपाललाई अन्तिम ओभरमा ४ रन मात्र आवश्यक थियो। १९.४ ओभरमा १ रन मात्र बाँकी रहेको अवस्थामा किरण ठगुन्ना क्याचआउट भएपछि खेल रोमाञ्चक बनेको थियो। त्यसपछि ब्याटीङमा आएका सन्दीप लामिछानेले १ रन जोडेपछि नेपाल झिनो अन्तरले विजयी भएको हो ।

नेपालका लागि कुशल भुर्तेलले सर्वाधिक ३० रन बनाए। त्यस्तै, दीपेन्द्रसिंह ऐरीले १४, बासिर अहमदले १३ तथा किरण ठगुन्नाले १० रन बनाए।

टस जितेर पहिले बलिङ गरेको नेपालले स्कटल्याण्डलाई १९.३ ओभरमै अलआउट गराएको थियो।

बलिङतर्फ नेपालका लागि सन्दीप लामिछानेले घातक बलिङ गर्दै ४ ओभरमा ४ विकेट लिएर ११ रन मात्र दिएका थिए।

त्यस्तै, करण केसी र दीपेन्द्रसिंह ऐरीले २–२ र ललित राजवंशीले १ विकेट लिए। एक ब्याट्सम्यान रनआउट भएका थिए। स्कटल्याण्डका लागि माइकल लिस्कले ४६ रन बनाउनु बाहेक अन्य ब्याट्सम्यान टिक्न सकेनन्।

त्रिकोणात्मक ट्वान्टी–२० अन्तर्राष्ट्रिय शृंखलाको आफ्नो पहिलो खेलमा नेपाल सोमबार नेदरल्याड्ससँग तेस्रो सुपरओभरमा पराजित बनेको थियो। दोस्रो खेलमा जित निकालेको छ ।

नेपालको तेस्रो खेल नेदरल्याड्सविरुद्ध बिहीबार र चौथो खेल स्कटल्याण्डविरुद्ध शुक्रबार रहेको छ।