पोखरा । नेकोस कप राष्ट्रिय महिला भलिबल प्रतियोगितामा गण्डकी प्रदेशले चाैथाे स्थानमा चित्त बुझाउनुपरेको छ ।

हेटौंडामा बुधबार तेस्रो स्थानमा लागि भएको खेलमा गण्डकी नेपाल पुलिस क्लबसँग सोझो सेटमा पराजित हुँदा चौथो स्थानमा सीमित बनेको हो । पुलिसले गण्डकीलाई  २५–२३, २५–१८ र २५–१८ ले पराजित गरेको हो ।

चौथो बनेको गण्डकीले नगद ५१ हजार रुपैयाँ हात पार्‍यो । गण्डकीकी रिक्जना बोटे प्रतियोगिताकै उदीयमान खेलाडी बनिन् । उनले ट्रफी र नगद ५ हजार पाइन् । तेस्रो बनेको पुलिसले १ लाख प्राप्त गर्‍यो।

न्यू डायमण्ड च्याम्पियन

फाइनलमा एपिएफ क्लबलाई ३–० को सोझो सेटमा हराउँदै न्यू डायमण्ड स्पोर्टस् क्लब च्याम्पियन बन्यो । न्यू डायमण्डले एपिएफलाई २५–१२, २५–२३ र २५–१८ ले सोझो सेटमा पराजित गरेको हो ।

उपाधि जितेको न्यू डायमण्डले नगद ५ लाख हात पार्‍यो । उपविजेता बनेको एपिएफले ३ लाखमा चित्त बुझायो ।

उत्कृष्ट सर्भर कोपिला राना पुलिस, उत्कृष्ट लिब्रो न्यु डायमन्ड सलिना श्रेष्ठ, उत्कृष्ट ब्लकर एपीएफ गरिमा बोहोरा, उत्कृष्ट सेटर न्यु डायमन्ड प्रगति नाथ, उत्कृष्ट स्पाइकर एपीएफ निरुता ठगुन्ना र बेस्ट प्लेयर डाइमन्डकी सुमित्रा रेग्मी चुनिए ।

नेपाल स्पोर्ट्स क्लबको आयोजनामा भएकाे प्रतियाेगितामा ६ टाेली सहभागी भएका थिए ।