पोखरा । पोखरा–जोमसोम हवाई उडान दुई महिनासम्मका लागि बन्द हुने भएको छ ।

बर्खायामसँगै मुस्ताङ भ्रमण गर्ने हवाई यात्रुको सङ्ख्या घट्दै गएपछि निजी वायुसेवा कम्पनीले उडान बन्द गर्ने निर्णय गरेका हो ।

उक्त रुटमा नियमित उडान भर्दै आइरहेको तारा एअरलाइन्सको ट्वीनेटर जहाजले यही असार २ गतेदेखि दुई महिनाका लागि उडान स्थगित गरेको कम्पनीका जोमसोम स्टेशन इञ्चार्ज सुजन लालचनले जानकारी दिए । उनका अनुसार ताराले अब आगामी सेप्टेम्बरको पहिलो सातादेखि उडान पुनः सञ्चालन गर्नेछ ।

हवाई यात्रु कम भएको र मौसम प्रतिकुलताका कारण तारा एअरलाइन्सले उडान स्थगित गरेको हो ।

यता, समिट एअरलाइन्सले पनि उक्त रुटमा यही असार २० देखि दुई महिनाका लागि हवाई उडान बन्द गर्ने जनाएको छ । जोमसोमस्थित समिट एअरलाइन्सका स्टेशन इञ्चार्ज सुमन थकालीले अबको एक सातापछि दुई महिनाका लागि पोखरा–जोमसोम हवाई उडान बन्द गर्ने जानकारी दिए ।

उनका अनुसार अहिले यस रुटमा हवाई उडान दैनिक मुस्किलले एउटा मात्रै भएको छ । हवाई यात्रु पनि घट्दै गएको उनको भनाइ छ ।

जोमसोम नागरिक उड्डयन कार्यालयले मनसुन सुरु भएसँगै हवाई यात्रु घटेको जनाएको छ ।

बर्खायाम सुरु भएपछि हवाईमार्ग मात्रै नभइ सडकमार्गबाट जोमसोम आउने यात्रु पनि घटेको छ ।