काठमाडौं । काठमाडौंबाट ४० किलोग्राम लागु औषध गाँजा (पोलेन) र १ लाख २५ हजार नगद सहित ५ जना पक्राउ परेका छन् ।

पक्राउ पर्नेमा धादिङ, गजुरी गाउँपालिका ४ घर भएका वर्ष १९ को निराजन चेपाङ, वर्ष १९ को प्रकाश चेपाङ, वर्ष २० को शंकर चेपाङ, सोही ठाउँ घर भइ काठमाडौंको काठमाडौं महानगरपालिका ३ महाराजगञ्ज बस्ने वर्ष ३६ को जिवन प्रजा र काठमाडौं महानगरपालिका ३२ कोटेश्वर बस्ने वर्ष ३८ को सुमन चेपाङ रहेका छन् ।

बुधबार बिहान ८ बजे काठमाडौं महानगरपालिका ३२ पाल्पाकोट चोक कोटेश्वरमा लागु औषध गाँजा (पोलेन) को कारोबार भइरहेको भन्ने सूचनाको आधारमा जिल्ला प्रहरी परिसर, काठमाडौं तथा काठमाडौं उपत्यका अपराध अनुसन्धान कार्यालय समेतबाट खटिएको प्रहरी टोलीले उनीहरुलाई पक्राउ गरेको हो ।

प्रहरीका अनुसार कोटेश्वर स्थित रहेको एक घरको भुइँ तल्लामा डेरा गरी बस्ने धादिङ, गजुरी ४ का वर्ष ३८ को सुमन चेपाङको डेरा कोठाबाट लुकाई छिपाइ राखेको अवस्थामा लागु औषध फेला पारेको हो ।

प्रहरीले ४० किलोग्राम लागु औषध गाँजा (पोलेन), १ लाख २५ हजार नगद रुपैयाँ नगदसहित बा.५५प.४२६५ को १५० पल्सर मोटरसाइकल, बा.८५प.५२३४ को २२० पल्सर मोटरसाइकल र मोबाइल ३ थान बरामद गरेको जनाएको छ ।

पक्राउ परेका उनीहरुलाई काठमाडौं जिल्ला अदालतबाट ७ दिनको म्याद थप अनुमति प्राप्त भइ सो सम्बन्धमा थप अनुसन्धान भइरहेको प्रहरीले जनाएको छ ।