राष्ट्रिय एकता र मेलमिलापको सन्देश बोकेका युगपुरुष बि.पि. कोइरालाको ४३ औं स्मृति दिवसको अवसरमा विपि स्मृति एमेच्योर फुटसल प्रतियोगिता आजदेखि पोखरामा सुरु भएको छ ।

नयाँ गाउँ युथ क्लबको व्यवस्थापनमा पोखरा रंगशालामा सुरु भएको प्रतियोगिताको आयोजना अमित गुरुङ र अन्तिम गुरुङले आफ्ना दिवंगत साथिहरू अनिल गुरुङ, सजत कार्की र उत्तम गुरुङको स्मृतिमा गरेका हुन् ।

प्रतियोगिताको उद्घाटन गर्दै नेपाली कांग्रेसका केन्द्रिय सदस्य गुरुदत्त बरालले “विपि कोइरालाको राष्ट्रिय एकता र मेलमिलापको विचार आज खेलकुदमार्फत अघि बढाउन सकिन्छ” भन्दै खेलकुदमा राज्यको लगानी बढाउनुपर्नेमा जोड दिए ।

प्रतियोगितामा विजेता टिमले एक लाख रुपैयाँ नगदसहित शिल्ड, मेडल र ट्रफी प्राप्त गर्नेछ । यस्तै, उपविजेताले ५० हजार रुपैयाँ नगद, शिल्ड, मेडल र प्रमाणपत्र प्राप्त गर्नेछ । सर्वोत्कृष्ट खेलाडीले नगद पाँच हजार तथा उत्कृष्ट गोलरक्षक र उच्च गोलकर्ताले समान दुई÷दुई हजार रुपैयाँ प्राप्त गर्ने प्रतियोगिता संयोजक विकास गुरुङले जानकारी दिए ।

युवाको प्रतिभा उजागर गर्न र स्थानीय-राष्ट्रिय खेलाडीबिच सम्बन्ध सुदृढ गर्ने उद्देश्यले पहिलोपटक प्रतियोगिता आयोजना गरिएको अमित र अन्तिमले बताए । दुई दिनसम्म चल्ने प्रतियोगितामा करिब ३० टिमको सहभागिता रहको छ ।

प्रतियोगिताबाट बचेको रकम तनहुँको भानु नगरपालिका -७ मा रहेको चण्डिका बालगृहलाई सहयोग गर्ने आयोजकले जनाएको छ । हाल बालगृहमा विभिन्न जिल्लाका १८ जना असहाय बालबालिका आश्रित छन् ।

मुख्य प्रायोजकका रूपमा अमित र अन्तिम गुरुङ रहेका छन् भने प्रतियोगितामा प्रदेश खेलकुद परिषद् गण्डकी, लोकतान्त्रिक खेलकुद संघ कास्की र नयाँ गाउँ युथ क्लबको सहयोग रहेको छ ।