भोलि फागुन २१ गते बिहीबार हुने प्रतिनिधि सभा सदस्य निर्वाचनअन्तर्गत समानुपातिक प्रणालीतर्फ स्याङ्जाका अस्थायी मतदाताले कहाँ गएर मतदान गर्ने भन्ने टुंगो लागेको छ । जिल्ला अस्थायी मतदाता नामावली संकलन तथा व्यवस्थापन समिति स्याङ्जाको फागुन ५ गतेको निर्णयअनुसार सिफारिस गरिएका १ हजार ८५९ अस्थायी मतदाताका लागि निर्वाचन आयोगले फागुन ९ गते मतदान केन्द्र स्वीकृत गरेको हो ।

जिल्ला निर्वाचन कार्यालय स्याङ्जाका प्रमुख श्रीराम थापाका अनुसार शिव पार्वती वृद्धाश्रम तथा बहुउद्देश्यीय संस्था अन्तर्गत राम्दीधामस्थित वृद्धाश्रममा रहेका मतदाताले गल्याङ नगरपालिका–१ मालुङ्गास्थित वडा कार्यालयमा रहेको स्थायी मतदान केन्द्रबाट मत हाल्ने व्यवस्था मिलाइएको छ ।

गल्याङ–१ स्थित वृद्धाश्रममा १४ महिलासहित २६ जना आश्रित रहे पनि मतदाता परिचयपत्र बनाएका र स्थायी नामावलीमा नाम भएका चार जनाले मात्रै मतदान गर्न पाउने भएका छन् । तीमध्ये दुई महिला र दुई पुरुष रहेका छन् । उनीहरूले समानुपातिकतर्फ मत हाल्नेछन् ।

वृद्धाश्रमबाहेकका अन्य अस्थायी मतदाताले भने पुतलीबजार–१ स्थित जिल्ला कारागार कार्यालयमा स्थापना गरिएको अस्थायी मतदान केन्द्रबाट मतदान गर्नुपर्नेछ । जिल्लाबाट संकलित विवरणका आधारमा कारागारमै अस्थायी केन्द्र स्थापना गरिएको निर्वाचन कार्यालयले जनाएको छ ।

यसैबीच, स्याङ्जा कारागारका १७ जना कैदीबन्दीले पनि मत हाल्ने भएका छन् । कारागारमा चार महिलासहित १६४ जना कैदीबन्दी रहे पनि मतदाता परिचयपत्र र स्थायी नामावलीमा नाम भएका १७ जनाले मात्रै मतदान गर्न पाउने भएका हुन् । मतदान गर्ने सबै पुरुष कैदीबन्दी रहेको र उनीहरूले समानुपातिक प्रणालीअन्तर्गत मत हाल्ने प्रमुख थापाले जानकारी दिए ।

जिल्लाभर १ हजार ८५९ अस्थायी मतदाता रहेका छन् । निर्वाचनमा खटिन नपर्ने कर्मचारीहरूले पनि कारागारस्थित अस्थायी केन्द्रबाटै मतदान गर्न पाउने व्यवस्था गरिएको छ ।

स्याङ्जामा प्रतिनिधिसभाका दुई निर्वाचन क्षेत्र छन् । क्षेत्र नम्बर १ मा १ लाख ३० हजार ८८६ र क्षेत्र नम्बर २ मा १ लाख १७ हजार ९३० मतदाता रहेका छन् । यसरी जिल्लामा कुल मतदाता संख्या २ लाख ४८ हजार ८१६ पुगेको छ ।

जिल्लाभर १९९ मतदानस्थलमा ३२२ मतदान केन्द्र तोकिएका छन् । तीमध्ये ५६ स्थल अतिसंवेदनशील, ७१ संवेदनशील र ७२ साधारण रहेका छन् । जिल्ला प्रहरी कार्यालयले ती क्षेत्रमा विशेष सुरक्षा सतर्कता अपनाइने जनाएको छ ।

जिल्ला निर्वाचन अधिकारी श्रीराम थापाले तोकिएको दिन परिचय खुल्ने कागजात साथमा लिएर सम्बन्धित मतदान केन्द्रमा उपस्थित भई मतदान गर्न सबै मतदातालाई आग्रह गरेका छन् ।