पोखरा । रास्वपालाई कास्कीमा प्रत्यक्षभन्दा पनि समानुपातिकमा बढी मत खसेको छ ।

कास्कीका तीनवटै निर्वाचन क्षेत्रमा ‘क्लिन स्विप’ गरेको राष्ट्रिय स्वतन्त्र पार्टी (रास्वपा) प्रति मतदाताले प्रत्यक्षको तुलनामा समानुपातिकतर्फ अझ बढी मत दिएका हुन् ।

प्रतिनिधि सभा सदस्य निर्वाचनको अन्तिम परिणाम अनुसार कास्कीमा रास्वपाका उम्मेदवारहरूले पाएको कुल मतभन्दा पार्टीको चुनाव चिह्न ‘घण्टी’ मा खसेको मत ४ हजार ८४ ले बढी छ ।

प्रदेश निर्वाचन कार्यालय पोखराले सार्वजनिक गरेको अन्तिम तथ्यांक अनुसार कास्कीका तीनवटै क्षेत्रमा गरी रास्वपाले समानुपातिकतर्फ १ लाख १३ हजार ६ सय २८ मत प्राप्त गरेको छ । जबकि प्रत्यक्षतर्फ सोही पार्टीका तीन विजयी उम्मेदवारले १ लाख ९ हजार ५ सय ४४ मत मात्रै बटुलेका थिए ।

कास्कीमा रास्वपाले समानुपातिकतर्फ पहिलो स्थान सुरक्षित गर्दा नेपाली कांग्रेस २८ हजार ६ सय ५६ मतसहित दोस्रो र नेकपा एमाले २४ हजार १९९ मतसहित तेस्रो स्थानमा खुम्चिएका छन् ।

प्रदेश निर्वाचन कार्यालयका अनुसार निर्वाचन क्षेत्र नम्बर १ मा रास्वपाका प्रत्यक्ष उम्मेदवार खडकराज पौडेल ३९ हजार ८८३ मत ल्याएर विजयी भएका छन् । तर, सोही क्षेत्रमा पार्टीले समानुपातिकतर्फ ४१ हजार ३ सय ५६ मत प्राप्त गरेको छ । यहाँ प्रत्यक्षको तुलनामा समानुपातिकमा १ हजार ४७३ मत बढी खसेको छ ।

यस्तै, क्षेत्र नम्बर २ मा प्रत्यक्षतर्फका उम्मेदवार उत्तमप्रसाद पौडेलले ३१ हजार ९ सय ११ मत प्राप्त गर्दा समानुपातिकतर्फ पार्टीले ३३ हजार ६ सय ५७ मत पाएको छ । यस क्षेत्रमा प्रत्यक्षभन्दा समानुपातिकमा १ हजार ७ सय ४६ मत बढी छ ।

क्षेत्र नम्बर ३ मा पनि यही प्रवृत्ति दोहोरिएको छ । यहाँ रास्वपा उम्मेदवार बिना गुरुङले ३७ हजार ७ सय ५० मत ल्याएर जित हासिल गर्दा समानुपातिकतर्फ पार्टीको पक्षमा ३८ हजार ६१५ मत खसेको छ । यो प्रत्यक्षको तुलनामा ८६५ मत बढी हो ।

रास्वपाको मत बढिरहँदा नेपाली कांग्रेस र नेकपा एमाले जस्ता पुराना दलहरूको अवस्था भने रास्वपाको भन्दा ठीक उल्टो देखिएको छ । यी दलका उम्मेदवारले प्रत्यक्षमा जति मत पाए, समानुपातिकमा पार्टीले त्यो भन्दा निकै कम मत पाएका छन् ।

क्षेत्र नम्बर १ मा कांग्रेसका प्रत्यक्ष उम्मेदवार तिलकबहादुर रानाभाटले ११ हजार २ सय १४ मत पाउँदा समानुपातिकमा कांग्रेसले १० हजार ७ सय ७८ मत मात्र पाएको छ । यस्तै अवस्था एमालेको पनि छ ।