फागुन २१ गते सम्पन्न प्रतिनिधिसभा निर्वाचनमा स्याङ्जाका दुवै निर्वाचन क्षेत्रमा प्रत्यक्षतर्फ जित हासिल गरेको राष्ट्रिय स्वतन्त्र पार्टी (रास्वपा) समानुपातिकतर्फ पनि पहिलो भएको छ ।

निर्वाचन परिणाम अनुसार स्याङ्जा क्षेत्र नम्बर–१ मा रास्वपाले सबैभन्दा धेरै मत प्राप्त गरेको छ । घण्टी चुनाव चिह्नमा ३३ हजार ४९९ मत परेको छ, जुन प्रत्यक्षतर्फ पाएको मतभन्दा चार हजार ४२८ बढी हो ।

यसैगरी, दोस्रो स्थानमा नेपाली कांग्रेस रहेको छ । कांग्रेसको रुख चुनाव चिह्नमा १६ हजार ३९९ मत परेको क्षेत्र नं. १ का मुख्य निर्वाचन अधिकृत उपेन्द्रप्रसाद गौतमले जानकारी दिए । कांग्रेसले प्रत्यक्षतर्फ पाएको मतभन्दा समानुपातिकमा दुई हजार ४५८ मत कम आएको छ ।

त्यसैगरी, नेकपा (एमाले) ले सूर्य चुनाव चिह्नमा १४ हजार ४८५ मत प्राप्त गरेको छ । यो मत पनि प्रत्यक्षतर्फको मतभन्दा दुई हजार ३१९ कम हो ।

अन्य दलतर्फ राप्रपाको हलो चिह्नमा एक हजार ८७३ मत परेको छ भने नेकपाको पाँचकुने तारा चिह्नमा एक हजार ५३१ मत आएको छ । यस क्षेत्रमा समानुपातिकतर्फ ५७ राजनीतिक दल प्रतिस्पर्धामा रहेका थिए ।

क्षेत्र नम्बर–१ मा कुल १ लाख ३२ हजार ७४५ मतदाता रहेकामा ७२ हजार ९९ मत खसेको थियो । तीमध्ये दुई हजार १३१ मत बदर भएको निर्वाचन कार्यालय स्याङ्जाले जनाएको छ ।

यसैगरी, स्याङ्जा क्षेत्र नम्बर–२ मा समानुपातिकतर्फ पनि राष्ट्रिय स्वतन्त्र पार्टी (रास्वपा) नै अग्रस्थानमा देखिएको छ । घण्टी चुनाव चिह्नमा २९ हजार ५०९ मत परेको छ, जुन यस क्षेत्रमा प्रत्यक्षतर्फ पाएको मतभन्दा चार हजार १५५ बढी हो ।

दोस्रो स्थानमा नेपाली कांग्रेस रहेको छ । रुख चुनाव चिह्नमा १७ हजार ९३१ मत परेको क्षेत्र नम्बर–२ का निर्वाचन अधिकृत ऋषि पौडेलले जानकारी दिए । कांग्रेसले भने प्रत्यक्षतर्फ पाएको मतको तुलनामा समानुपातिकतर्फ झण्डै दुई हजार ८९९ मत कम पाएको देखिएको छ ।

नेकपा (एमाले) ले सूर्य चुनाव चिह्नमा ११ हजार ६ मत पाएको छ । यो संख्या पनि प्रत्यक्षतर्फको मतभन्दा करिब तीन हजार १०२ ले कम हो ।

अन्य दलहरूमध्ये राप्रपाको हलो चिह्नमा एक हजार ३४९ मत परेको छ भने नेकपाको पाँचकुने तारा चिह्नमा एक हजार ४७ मत आएको छ । श्रम संस्कृति पार्टीले पनि एक हजारभन्दा बढी मत पाएको छ, उसले एक हजार ९ मत प्राप्त गरेको छ ।

यस क्षेत्रमा समानुपातिकतर्फ ५७ वटा राजनीतिक दल प्रतिस्पर्धामा थिए । तर गतिशील लोकतान्त्रिक पार्टी, स्वाभिमान पार्टी र जनप्रिय लोकतान्त्रिक पार्टीले भने कुनै पनि मत पाउन सकेनन् ।

क्षेत्र नम्बर–२ मा कुल १ लाख १७ हजार ९३० मतदाता रहेकामा ६५ हजार १३० मत खसेको थियो । तीमध्ये एक हजार ९९९ मत बदर भएको निर्वाचन कार्यालयले जनाएको छ ।

स्याङ्जामा प्रत्यक्षतर्फ दुवै क्षेत्र जितेको रास्वपा समानुपातिकतर्फ पनि अग्रता कायम गर्दै जिल्लामा आफ्नो प्रभाव बलियो बनाएको देखिएको छ ।