नेकपाका संयोजक पुष्पकमल दाहाल ‘प्रचण्ड’ ले प्रदेशमा एमालेसँगै गठबन्धनको वातावरण बनाउन निर्देशन दिएका छन् ।

श्रीलंकाबाट फर्किएपछि उनले समीकरणबारे पार्टीभित्र र बाहिर छलफल चलाइरहेका छन् । प्रदेशका मुख्य नेतालाई काठमाडौं बोलाएर अवस्थाबारे जानकारी लिँदै दाहालले एमालेसँग गठबन्धन गरेर जानुपर्ने अवस्था रहेको बताएका छन् ।

अहिलेसम्म गठबन्धन गर्ने निश्चितजस्तै भए पनि कुन प्रदेश कसलाई भन्ने विषयमा टुंगो लाग्न बाँकी रहेको छ ।

अधिकांश नेता-कार्यकर्ताको दबाब र कम्युनिष्ट आन्दोलन जोगाउने लक्ष्यसहित अहिले नेकपा र एमाले गठबन्धन नजिक पुगेको बताइन्छ ।

सुदूरपश्चिम, कोशीलगायतका प्रदेशमा बजेटको विषयलाई लिएर एमाले-कांग्रेसबीच तिक्तता आएसँगै अहिले भइरहेको गठबन्धनमा दरार आएको थियो । त्यसमाथि ओली प्रचण्डसँग सहकार्यको संवादमा रहेको सुइँको पाएपछि कांग्रेस नेतृत्व थप सशंकित बनेको छ ।