काठमाडौँ । जनता समाजवादी पार्टी नेपालका अध्यक्ष उपेन्द्र यादवले जेनजी आन्दोलनका कारण देशको स्वाधीनता खतरामा परेको बताएका छन् । शनिबार आठ दलको अग्रगामी मोर्चा घोषणा कार्यक्रममा बोल्दै उनले सो कुरा बताएका हुन् ।

अध्यक्ष यादवले देशको स्वाधीनता खतरामा परेका कारण अग्रगामी मोर्चा गठन गरिएको बताए । देशमा धेरै राजनीति परिवर्तन भएको तर उत्पीडित समुदायले न्याय नपाएको बताउँदै उनीहरूलाई न्याय दिलाउन अग्रगामी मोर्चा अगाडि बढेको उनले बताए ।

देशमा सर्वसत्तावाद आएको र यसले अधिनायकवाद जन्माउने बताउँदै उनले जनताले प्राप्त गरेको उपलब्धिमाथि प्रहार भएको उनको भनाइ छ । प्राप्त उपलब्धिको रक्षाका लागि मोर्चा अघि बढेको बताउँदै यादवले संविधान समावेशी बनाउनका लागि मोर्चाले सङ्घर्ष गर्ने बताए ।

अध्यक्ष यादवले अहिलेको संविधान संशोधन हुन आवश्यक रहेको समेत बताए । ‘देशमा न सुशासन छ, न भ्रष्टाचार अन्त्य भएको छ, आर्थिक रूपमा देश जर्जर भयो’ यादवले भने ।

देशको अग्रगामी परिवर्तनका लागि जनता जागिसकेको बताउँदै उनले जनताको बलमा यो मोर्चा गठन भएको बताए । यो अभियानलाई सरकारले सम्मान गर्नुपर्ने बताउँदै उनले सबैका लागि अग्रगामी परिवर्तन नभए मोर्चाले सङ्घर्ष गर्ने बताए ।

आगामी दिनमा अन्य परिवर्तनकामी सङ्गठनहरू पनि मोर्चामा सहभागी हुने बताउँदै उनले विभेदमा परेकाहरू साझा मोर्चा जोडिने बताए । यो मोर्चाबाट कोही आतङ्कित हुनु नपर्ने बताउँदै उनले जनताको अधिकारका लागि यो गठन भएको बताए । उनले सबै राजबन्दीलाई रिहा गर्न समेत सरकारसँग माग गरे ।