नेकपा एमालेका अध्यक्ष केपी ओलीले सरकारले काम नगरेको टिप्पणी गरेका छन्।

शुक्रबार बाढी प्रभावित क्षेत्रको अवलोकनको क्रममा नुवाकोट पुगेका ओलीले सरकार प्रचारमा मात्र सीमित रहेको आरोप लगाए।

सरकारको प्रभावकारिता पर्याप्त नभएको बताउँदै उनले भने,‘ सरकारको त केही नै भएन। अहिले हेलिकप्टर उडेको देख्छु। चार–पाँचवटा गइसक्यो। ती किन उडिराख्या छन् थाहा छैन। यहाँ मानिसहरू अलपत्र छन्।’

अध्यक्ष ओलीले बाढी पीडितसँग हामी केही गर्छौँ भनेर ढाडस दिने मान्छेसमेत नभएको बताउँदै जनताले सरकारको कामको मूल्याङ्कन गरिरहेको बताए।

सरकारका मन्त्रीहरू एआईबाट बनेको फोटो देखाएर प्रचारमा लागेको आरोप लगाउँदै उनले पपुलारिटी बटुल्ने काम भइराखेको बताए।

‘मन्त्रीहरू एआई सिर्जित फोटो हिलाम्मे मान्छे बोकेर गाडीमा मन्त्रीले राखेका तस्बिरहरू देखाएर पपुलारिटी बटुल्ने काम भइराखेको छ’, उनले भने, ‘हामीलाई एआई सिर्जित तस्बिरहरूको प्रचार होइन, हामीलाई जनतालाई राहत दिने काम चाहिएको छ।’