बिहानै विद्यालय गएका छोराछोरी अब फर्किन्छन् कि भनेर बाटो हेरिरहेका आमाबाबु, मृत्युको अँध्यारो सुरुङभित्र कतै प्रियजनको सास अझै बाँकी छ कि भनेर छट्पटाउँदै बगरमा भड्किइरहेका आफन्त, लेदो र हिलोले पुरिएको घरभित्रबाट अझै आवाज आउँछ कि भनेर चिच्याइरहेका ती पुकारहरू अनि बेपत्ता आफन्त पर्खेर प्रत्येक सेकेन्ड सास रोकिएला जसरी सुखद् समाचार सुन्न आफन्तजनको अवस्था र मनस्थिति कल्पनाभन्दा बाहिर छ । सोच्दा पनि मुटु काँप्छ, आङ सिरिङ्ङ हुन्छ, भोग्नेलाई कस्तो भएको होला ? 

यस्तो अकलपनीय विध्वंशमा सर्वस्व गुमाएका र मृत्युसँग पौँठेजोरी खेलिरहेका नागरिकबाट राज्यमाथि आक्रोश पोखिनु एकदमै स्वाभाविक हो । आफन्तको सास खोजिरहेका ती आत्तिएका आँखालाई यो प्राकृतिक विध्वंशको आयतन कति विशाल छ भनेर नाप्ने फुर्सद हुँदैन । 

सरकारले देशमा उपलब्ध सम्पूर्ण स्रोत साधन परिचालन गरेको छ कि छैन, हाम्रा सेना र प्रहरी जवान ज्यानै हत्केलामा राखेर त्यो मृत्यु सुरुङको कति गहिराइसम्म पुगेका छन्, यी तथ्यहरूले उनीहरूलाई सान्तावना दिँदैनन् । उनीहरूलाई त केवल एउटा कुरा चाहिएको छ, मेरो प्रियजनको सास बाँकी छँदै राज्य त्यहाँ पुगिदिओस्, उद्धार गरिदेओस् । यो आशा निराशामा बदलिँदा उत्पन्न हुने आक्रोश उनीहरूको नैसर्गिक अधिकार हो । 

त्यसैले, म सरकारका सम्पूर्ण संयन्त्र, नेतृत्व र पार्टी सदस्यहरूलाई यही रोष्ट्रमबाट स्मरण गराउन चाहन्छु, जब मानिसक गहिरो चोटमा पर्छ, जब उसले अप्रत्यासित शोक भोग्छ, उसले भगवानलाई त सराप्त छ भने यो सरकार के हो ? रास्वपपा के हो ?

नागरिकको त्यो आक्रोशलाई हामीले हाम्रो विरुद्धको प्रहार होइन हामीप्रतिको अपेक्षा, राज्य गुहार्ने अन्तिम चित्कारको रूपमा बुझ्नुपर्छ । त्यो आक्रोश सुन्ने, सहने र उनीहरूको आँशु पुछ्ने फराकिलो छाति नै आजको साँचो राज्यसत्ता हो ।

उनीहरूको अवस्था र मनस्थितिलाई सहानुभूतिसाथ महसुस गर्नु हाम्रो दायित्व हो । सरकार र दलका सम्पूर्ण सुभेच्छुकहरूलाई एउटा गम्भीर अपील गर्न चाहन्छु, यो महाविपत्तिको समयमा सर्वस्व गुमाएका नागरिकको स्वाभाविक आक्रोशलाई लक्षित गरेर सामाजिक संजाल वा चोक चौतारोमा चुत्छ टिकाटिप्पणी र कटाक्ष गर्ने कार्य आजै र अहिल्यै बन्द गरौं ।

सरकारलाई मेरो स्पष्ट आग्रह छ, पीडामा रहेका नागरिकमाथि कतैबाट यस्ता अमानवीय दुर्व्यवहार भएका छन् भने त्यसका विरुद्ध हामी निर्मम हुन्छौं भनेर विज्ञप्ति मात्रै निकाल्ने होइन, राज्य साच्चिकै निर्मम छ र पीडितको पक्षमा उभिएको छ भन्ने कुरा नागरिकले महसुस गर्ने गरी देखाउने हो, देखाइदिनुहोला ।