पोखरा । नेपाल विद्यार्थी संघ आफ्नै मूल पार्टी नेतृत्वको सरकार विरुद्ध सडकमा उत्रिएको छ । नेपाली कांग्रेसको भातृ संस्थाको रुपमा रहेको नेपाल विधार्थी संघले आफ्नै माउ पार्टीको सरकारले गरेका गलत निर्णय विरुद्ध सडकमा प्रदर्शन गरेको हो ।

उसले मुख्यमन्त्री कार्यालय अगाडि गण्डकी प्रदेश सरकारको विरोध प्रदर्शन गरेको छ । नेपाली कांग्रेस नेतृत्वमा रहेको गण्डकी प्रदेश सरकारले सवारी साधनको नवीकरण गर्दा शुरुमै २ सय प्रतिशत जरिवाना लगाउने निर्णय कार्यान्वयनमा गएपछि आम सर्वसाधारणबाट सरकारको कडा आलोचना भएको थियो । सरकारले केही अघि गण्डकी प्रदेशमा सवारी कर र जरीवानामा भारी वृद्धि गरेको थियो ।

पानी परिरहेको भएपनि नेविसंघका कार्यकर्ताहरु विभिन्न नारा लगाउँदै त्यहाँ पुगेका थिए । उनीहरुले करवृद्धि फिर्ता गर, जरिवाना कर फिर्ता, मुख्यमन्त्री राजीनामा दे, भौतिक मन्त्री होसियार जस्ता नारा लगाए ।

विघार्थीहरुले कर वृद्धिको निर्णय तत्काल फिर्ता गर्नुपर्ने, अन्यथा मुख्यमन्त्रीको निवासमा नै प्रदर्शन गर्ने चेतावनी दिएका थिए । कार्यक्रममा नेविसंघ, कास्कीका पूर्व अध्यक्ष विकास थापाले कांग्रेस नेतृत्वको सरकारले गलत गर्दा नेवि संघले खवरदारी गरिरहने बताए । थापाले दुई दिनभित्र सवारी कर र जरिवाना फिर्ता नभए गेटमा नभई कोठासम्म पसेर श्रीलंकामा प्रदर्शनकारीले गरेको आन्दोलनको झल्को दिने चेतावनी दिए ।

कार्यक्रममा नेपाली कांग्रेस कास्कीका सचिव भानु ढकाल, नेविसंघका नेता पशुपति भट्टराई र ध्रुवराज अधिकारी लगायतले गण्डकी प्रदेश सरकारले मात्र नभएर सबै तहका सरकारले जनभावना बुझेर काम गर्नुपर्नेमा जोड दिएका थिए ।