रुपन्देही। आफ्नै श्रीमतीको हत्या गरेको अभियोगमा प्रहरीले एक पुरुषलाई पक्राउ गरेको छ। पक्राउ पर्नेमा कञ्चन गाउँपालिका-१ डेलर बस्ने ३३ वर्षीय यम बहादुर थापा क्षेत्री रहेका छन्।

क्षेत्रीले बुधबार राति आफ्नी ३१ वर्षीया श्रीमती साबित्री थापा क्षेत्रीको विभत्स हत्या गरेको अभियोगमा प्रहरीले क्षेत्रीलाई पक्राउ गरेको हो । घटना अनुसार श्रीमान् यम बहादुर मादक पदार्थ सेवन गरी सुतेकोमा राति उठेर पैसा गन्दा एक हजार कम भएपछि श्रीमतीलाई उठाई पैसा नसोधी लिएको भन्दै खाटको खुट्टा र भित्तामा टाउको ठोकाई हत्या गरेको प्रहरीले जनाएको छ।

प्रहरीका अनुसार श्रीमती सावित्रीले समेत अघिल्लो दिन साँझ दराजमा राखेको नगद १ हजार रुपैयाँ निकालेर रक्सी किनेर खाएको अनुसन्धान पश्चात खुलेको छ।

घटनाको भोलिपल्ट बिहान साबित्री मृत अवस्थामा रहेको भन्ने सूचना प्राप्त हुनासाथ ईलाका प्रहरी कार्यालय सालझण्डीबाट खटिएको प्रहरीले घटना शंकास्पद र हत्या भएको हुन सक्ने देखिएपश्चात यम बहादुरलाई नियन्त्रणमा लिएको हो ।

उनीमाथि ज्यान सम्बन्धि कसूर अन्तर्गत म्याद थप गरी जिल्ला प्रहरी कार्यालयले आवश्यक अनुसन्धान गरिरहेको जनाएको छ ।